«Եղբայրս՝ «Սև Հովազ» ջոկատի ադամ Վարդան Մկոյանը (Ճուտ) «Արթիկ» քրեակատարողական հիմարկում օգոստոսի 14-ից հացադուլի մեջ է, բայց իր առողջական վիճակով հետաքրքրվող չկա»։
Այս մասին NewDay.am-ին է ահազանգում բանտարկված ազատամարտիկ Վարդան Մկոյանի եղբայրը՝ Գևորգ Մկոյանը։ Ըստ նրա՝ եղբորն անգամ ՄԻՊ գրասենյակից չեն այցելել։
«Իմ տեղեկություներով՝ անգամ բժշկական նորմալ զննություն չի իրականացվում։ Նրան միայն Շիրակի մարզի դատախազի տեղեկալն է այցելել, հորդորել է հացադուլը դադարեցնել։ Համապատասխան մարմինները ոչ մի խոսք չեն ասում եղբորս առաջ քաշած խնդիրների մասին»,-մանրամասնեց Գևորգ Մկոյանը։
Գևորգ Մկոյանի խոսքով՝ եղբորը կեղծ մեղադրանք են առաջադրել ու բանտարկել, իբր թե մահափորձ է ծրագրել Անդրանիկ Քոչարյանի ու Նիկոլ Փաշինյանի դեմ։
«Երկու տարի է ազատազրկված է, նախ տնային կալանքի տակ էր պատշաճ վարքագիծ է ունեցել, չգիտես` ինչու խափանման միջոցը փոխեցին։ Դիմում է վաղաժամկետ ազատ արձակվելու համար մերժում են։ Եղբայրս դիմել է թե արդարադատությունից խուսող Նիկոլ Փաշինյանին, թե ընդդիմությանը»,-մանրամասնեց Գևորգ Մկոյանը։
Հիշեցնենք, որ հացադուլ հայտարարելուց հետո ազատամրտիկ Վարդան Մկոյանի բաց նամակը հրապարակվել էր 24 news լրատավական կայքում, որում նշվում էր․
«Պրոբացիան մերժում է ինձ այն բանի համար, որ կալանավայրում կազմակերված միջոցառումներին և կրոնական միջոցառումներին չեմ մասնակցում, սակայն իմ՝ այստեղ գտնվելու ժամանակահատվածում ոչ մի կրոնական միջոցառում չի կազմակերպվել։ Ես «Գորիս» քրեակատարողական հիմնարկում բազմիցս պահանջել եմ հոգևորականի այցելություն։ Դատարանում ասել եմ, որ զրկված ենք Սուրբ Պատարագի մասնակցելու հնարավորությունից, գոնե հոգևորականի այցելություն կազմակերպեն, որ ամիսը մեկ անգամ Սուրբ Հաղորդություն ստանանք։ Պատճառաբանել են, որ կրթական ծրագրերին չեմ մասնակցում։ Ես զարմանում եմ այս փտած արդարադատության վրա։ Հիմա ամեն ինչ թողնեմ, կարմիր գրիչ վերցնեմ Պրոբացիայի ծառայության սխալների ուղղում անե՞մ, որ ապացուցվի, որ մենք այստեղ չենք կրթվում։ Նշել են, որ չեմ խրախուսվել կալանավայրում։ Ամբողջ կյանքս նվիրել եմ հայրենիքիս ու պետականության հզորացմանը, «խրախուսվել եմ» 7․5 տարի ազատազրկման։ Հիմա չգիտեմ՝ կալանավայրում ի՞նչ խրախուսանք ստանամ ու քանի տարի նորից կազատազրկվեմ։ Ես ձերբակալվել եմ 2022 թվականի սեպտեմբերի 25-ին, մոտ երկու տարի ամենախիստ բանտային ռեժիմում եմ անցկացրել։ Նաև երկար ժամանակ տնային կալանքում եմ եղել։ Ինձ ձերբակալել են Արցախի Հանրապետությունում 2022 թվականին՝ ապօրինի զենք – զինամթերք կրելու, պահելու համար և ընթացքում գործ են հարուցել՝ սպանության փորձի նախապատրաստում Նիկոլ Փաշինյանի և Անդրանիկ Քոչարյանի դեմ։ Ապօրինի զենք – զինամթերք պահելու մեղադրանք ընդունում եմ և չեմ էլ հերքում, իսկ սպանության փորձի նպատակ երբևէ չեմ ունեցել։ Դա քաղաքական հետապնդում է, բոլոր օրենքները բռնաբարել են և այդ հոդվածը կարել են իմ վրա»։
