Երեկ՝ գիշերը ժամը 01։30-ի սահմաններում, Վիկտոր Համբարձումյան փողոցի բնակիչները դուրս են եկել փողոց և փորձել դադարեցնել ծանր տեխնիկայի աշխատանքը։ Բնակիչներից մեկի խոսքով՝ խնդիրը ոչ թե փողոցի վերանորոգումն է, այլ աշխատանքների կատարման համար ընտրված ժամը։
«Այս փողոցը միակողմանի է և ծանրաբեռնված չէ։ Այնպես չէ, որ եթե փողոցը փակեն ու ցերեկային ժամերին աշխատեն, Բաղրամյան պողոտան կծանրաբեռնվի։ Մենք առաջարկեցինք, որ քանդման աշխատանքներն իրականացնեն ցերեկային ժամերին։ Չենք կարողանում քնել»,- նշեց Համբարձումյան փողոցի բնակիչը։
Նրա խոսքով՝ հատկապես հին ասֆալտի քանդման և հորատման աշխատանքների ժամանակ առաջացող բարձր աղմուկը գիշերային ժամերին անընդունելի է։
Կապալառու ընկերության պատասխանատուն բնակիչներին հայտնել է, որ գիշերային ժամերին աշխատանքներ իրականացնելու հանձնարարությունը ստացել են քաղաքապետարանից և իրենք պարտավոր են այն կատարել։
Մինչդեռ, ըստ «Վարչական իրավախախտումների վերաբերյալ» ՀՀ օրենսգրքի 180-րդ հոդվածի, գիշերային ժամանակ՝ 23։00-ից մինչև 07։00-ն, լռությունը խախտելը, այդ թվում՝ աղմուկով ուղեկցվող աշխատանքներ կատարելը, որոնք կապված չեն անհետաձգելի անհրաժեշտության հետ, համարվում է վարչական իրավախախտում։
Հենց այս հանգամանքն էլ մատնանշեցին բնակիչները՝ պնդելով, որ տվյալ աշխատանքները չեն կրում անհետաձգելի բնույթ և կարող են իրականացվել ցերեկային ժամերին։
Վեճին միջամտել են ոստիկանության ծառայողները, այնուհետև՝ քաղաքապետարանի շինարարության ոլորտի պատասխանատուն։ Երկարատև քննարկումից հետո գիշերային աշխատանքները դադարեցվել են:
Բնակիչները նշում են, որ դեմ չեն իրենց փողոցի բարեկարգմանը և նույնիսկ ողջունում են այն, սակայն կարծում են, որ քաղաքային ենթակառուցվածքների զարգացումը չպետք է իրականացվի քաղաքացիների գիշերային հանգստի հաշվին։ «Այս առումով կոչ ենք անում Երևանի քաղաքապետարանին վերանայել բնակելի հատվածներում գիշերային ժամերին ծանր տեխնիկայի կիրառմամբ շինարարական աշխատանքների կազմակերպման պրակտիկան և հնարավորության դեպքում դրանք իրականացնել ցերեկային ժամերին»,- ավելացրեց մեր զրուցակիցը։
