Փաստաբան Աննա Ծառուկյանը ֆեյսբուքյան իր էջում գրում է․
Այսօր Ani Gevorgyanի հաղորդման հիման վրա քրեական վարույթ չնախաձեռնելու մասին որոշման դեմ մեր ծավալուն բողոքն ուղարկվեց դատարան։
Ու այստեղ խնդիրը միայն այն չէ, որ վարույթ չեն նախաձեռնել։ Խնդիրն այն է, որ Անիի հաղորդմամբ ներկայացված փաստերին նույնիսկ պատշաճ քրեաիրավական գնահատական չի տրվել։
Սուբյեկտի գործողություններում առերևույթ պետք է ստուգվեն մի շարք հանցակազմեր՝ խուլիգանություն, լրագրողի մասնագիտական օրինական գործունեությանը խոչընդոտում, ատելության կամ անհանդուրժողականության հրապարակային խոսք, բռնության հրապարակային կոչեր, իսկ համապատասխան փաստերի դեպքում՝ նաև հոգեկան ներգործություն։
Խոսքը պարզապես «վիրավորել է՝ չի վիրավորել» մակարդակի մասին չէ։ Խոսքը հանրային վայրում տեղի ունեցած միջադեպի, լրագրողական գործունեությանը միջամտելու, հետապնդման, հրապարակային նվաստացման և այդ ամենը սոցիալական ցանցերով շարունակելու մասին է։
Ու ամենակարևորը՝ մենք չենք ասում՝ առանց քննության մեղավոր ճանաչեք։
Ասում ենք՝ քննեք։
Որովհետև հանցակազմի առկայությունը կամ բացակայությունը պետք է պարզվի օրենքով նախատեսված քրեադատավարական ընթացակարգով, ոչ թե քննությունը փոխարինող մի գրությամբ։
Իսկ երբ քաղաքացու հաղորդմանը օրենքով նախատեսված ընթացակարգի փոխարեն պատասխանում են դատավարությունից դուրս գրությամբ, դրա օրինականությունը արդեն դատարանի գնահատման հարցն է։
Եվ ուրեմն արդեն իսկ այսօր այդ հարցը դատարանում է։
