Տասն օր է, ինչ է կալանավորվել է ՀՀ ՊՆ Վայոց Ձորի զինվորական կոմիսար Գագիկ Գրիգորյանը՝ կաշառքի գործով, բայց նրան առնչվող գործին փորձում են անաղմուկ հանգուցալուծում տալ, որ ազատության մեջ հայտնվի։ Այս մասին NewDay.am-ին ահազանգում են Եղեգնաձորի բազմաթիվ բնակիչներ։
«Որևէ մեկը ձերբակալության, կալանավորման մասին պաշտոնական հաղորդագրություն չի տարածում։ Չեն մանրամասանում՝ ինչ կոռուպցիոն սխեմաների մեջ է եղել։ Պատճառը մենք լավ գիտենք․ նա Ներքին գործերի նախարարության Ոստիկանության Վայքի բաժնի պետ գնդապետ Գևորգ Գրիգորյանի եղբայրն է, հասկանալի է` ինչ կապեր ունի։ Բնակիչներով ենթադրում ենք, որ կապերն իրենց գործն անում են։ Բացի այդ Գևորգ Գրիգորյանի կուրսընկերը պաշտպանության նախարարի տեղակալ Արման Սարգսյանն է։ Բա էս թալանի ու հովանավորչության մասին ինչու՞ չեն աղմկում։ Կան տեղեկություններ, որ Գագիկի խափանման միջոցը կարող է փոխվել, բայց հանկարծ աղմուկ չլինի»,-մանրամասնեց բնակիչներից մեկը։
Նշենք, որ մեզ ահազանգող քաղաքացիները պատմում էին, որ հասկանալի չէ, թե ինչպես է գնդապետի աստիճանի հասել Գագիկ Գրիգորյանը։
«Մի օր զորքի հետ չի ծառայել, չգիտի ՝ ինչ է բանակը ու միանգամից հասել է զինկոմ, գրեք, որ իմանան ՝ ինչ է կատարվում։ Կամազներ ունեն, Երևանում բնակելի շենք են կառուցել ու վաճառել, թանկարժեք մեքենաներով են շրջում, հիմա էլ կարող են կոռուպցիան մարսել »,-մանրամասնեցին քաղաքացիները։
