ԱՄՆ–ի օգնության նոր փաթեթը լարվածության և էսկալացիայի անմիջական աճի կհանգեցնի, բայց իրադարձությունների ընթացքը չի փոխի։ Այս հայտարարությունն արել է ՌԴ նախագահի մամուլի քարտուղար Դմիտրի Պեսկովը։
Ավելի վաղ «Ռոյթերս» գործակալությունը, հղում անելով ԱՄՆ երկու պաշտոնյայի, հայտնել էր, որ ԱՄՆ–ն Ուկրաինայի համար 2.2 մլրդ դոլարի ռազմական օգնության փաթեթ է նախապատրաստում, որում առաջին անգամ կարող են ներառվել կրկնակի մեծ հեռահարության հրթիռներ։
«Այո՛, սա լարվածությունը թեժացնելու, էսկալացիայի մակարդակը մեծացնելու ուղիղ ճանապարհ է։ Մենք դա տեսնում ենք, և դա մեզնից լրացուցիչ ջանքեր է պահանջում։ Բայց ևս մեկ անգամ նշենք` դա իրադարձությունների ընթացքը չի փոխի, ռազմական հատուկ գործողությունները շարունակվելու են», – ասել է ՌԴ նախագահի մամուլի քարտուղարը լրագրողներին։
Այժմ HIMARS–ն կայանքները ուկրաինական զորքին մատակարարվում են 80 կմ հեռահարության GMLRS ռեակտիվ արկերով։
Պեսկովն ընդգծել է նաև, որ ՌԴ նախագահի և ԱՄՆ առաջնորդի միջև բանակցություններ չեն նախատեսվում։
«Պուտինի և Բայդենի բանակցությունների վերաբերյալ որևէ ծրագիր չկա, մեր հիմնական նպատակը ռազմական հատուկ գործողությունները շարունակելն է, գլխավոր նպատակը` պետության ղեկավարի նախանշված խնդիրները կատարելը», – ասել է նա։
Հիշեցնենք՝ փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։
Ուկրաինայում մարտական գործողություններն ընթանում են արդեն 341-րդ օրը։
