Մասիս խոշորացված համայնքի ղեկավար Դավիթ Համբարձումյանն իր ֆեյսբուքյան էջում գրել է․
Նոր Կյուրինը Մասիս խոշորացված համայնքի այն բնակավայրերից մեկն է, որտեղ ևս առկա են տարիներ շարունակ կուտակված բազմաթիվ խնդիրներ։
Բնակավայրի կարևորագույն հարցերից է եղել դպրոցի և մանկապարտեզի ջեռուցման հարցը, որը դեռևս նախորդ տարվանից գտնվել է իմ ուշադրության կենտրոնում։ Խնդիրն արդեն իսկ լուծված է, և համայնքային միջոցներով երկու կրթօջախներում էլ անցկացվել է ջեռուցման համակարգ:
Այսօր իմ տեղակալ Խորեն Արոյանի, համայնքապետարանի աշխատակազմի ներկայացուցիչների հետ այցելել եմ Նոր Կյուրին բնակավայր։
Ջերմորեն ողջունելով հյուրերին՝ երկու կրթօջախների տնօրեններն էլ կարևորել են կատարված աշխատանքը և շնորհակալություն հայտնել տասնյակ տարիներ անլուծելի թվացող խնդրին լուծում տալու համար։
Ծրագրի իրագործումը ողջունել է նաև Մարմարաշենի Սուրբ Գևորգ եկեղեցու հոգևոր հովիվ Տեր Ղազար քահանա Թորոսյանը։
Հոգևոր հովիվը կատարել է նաև տնօրհնեքի կարգ և ներկաների համար հայցել պահպանություն Ամենակալից, իսկ մեզ մաղթել արգասաբեր աշխատանք՝ ի բարօրություն Մասիս խոշորացված համայնքի:
Այնուհետ հանդիպել ու զրուցել եմ դպրոցի ուսուցիչների, աշխատակիցների, բնակիչների հետ։
Ողջունելով ներկաներին՝ նշել եմ, որ շատ կարևորում եմ մատաղ սերնդի կրթության ու դաստիարակության հարցը, և որ հայրենիքի վաղվա օրը կառուցողները պիտի կրթվեն նորմալ պայմաններ ունեցող կրթօջախներում։ Նաև շնորհակալություն եմ հայտնել Նոր Կյուրինի վարչական ղեկավար Մյասնիկ Գրիգորյանին՝ հետևողական ու սրտացավ աշխատանքի համար:
Խոսել եմ առաջիկա անելիքների մասին, որոնց հիմքում համայնքային կարևորության հարցեր են, ինչպես նաև տեղեկացրել, որ Նոր Կյուրինում շուտով կկառուցվի եկեղեցի, որը կկոչվի Սուրբ Մանե՝ ի հիշատակ Սուրբ Հռիփսիմյանց կույսերից Սուրբ Մանեի: Պատասխանել եմ նաև բարձրաձայնված մի շարք հարցերի, որոնց հետ կապված տրվել են հանձնարարականներ:
Հավելել եմ, որ դպրոցը շուտով կունենա նաև շախմատի նոր ու բարեկարգ դասասենյակ:
Բնակիչները նույնպես շնորհակալություն են հայտնել կատարված աշխատանքների համար և հույս հայտնեցին, որ մեր հանդիպումները կկրեն պարբերական բնույթ:
Այցելել եմ նաև այն տարածք, որտեղ կառուցվելու է Սուրբ Մանե եկեղեցին:
