Լրագրողների հետ հանդիպման ժամանակ փաստաբան Արսեն Սարդարյանը ասաց, որ Արցախի պաշտպանության նախկին նախարար Ջալալ Հարությունյանի քրեական գործով որոշակի զարգացումներն կան։
Նա մասնավորապես ասաց, որ շուրջ 5 ամիս տևած ռազմագիտական համալիր փորձաքննության եզրակացությունը ստացել են, սպաները միակարծիք եզրակացություն են տվել, որը, յուրաքանչյուր իրավաբանի գնահատմամբ առերևույթ վկայում է Ջալալ Հարությունյանին մեղսագրվող գործողություններում նրան առաջադրված հանրային հետապնդման հիմքերի բացակայության մասին։
Այս եզրակացությունը ստանալուց հետո, ունեցել են դատախազության կողմից կայացրած հիմնավոր որոշում առաջին դրվագով (հակահարվածի մասին) մեղադրանքը դադարեցնելու վերաբերյալ։
Փաստաբանն ասաց նաև, որ Ջալալ Հարությունյանին մեղադրում էին, թե իբր ուժերի հարաբերակցությունը հաշվի չի առել, այդ իրադրությունում թշնամու նկատմամբ հարձակում կատարելը չէր կարող կանոնադրության պահանջներից բխել։ Ռազմագետները միանշանակ պատասխանեցին, որ այդ իրադրությունում դա ոչ միայն եղել է օրինական, այլև եղել է անհրաժեշտություն, որը կատարվել է Ջալալ Հարությունյանի կողմից: Այս մասով քրեական հետապնդումը դադարեցվել է։
Սակայն երկրորդ դրվագի մասով քրեական նոր հետապնդում է առաջադրվել, անունով նոր է, բայց այն ամբողջությամբ կրկնում է արդեն իսկ առաջադրված նախկին մեղադրանքը, և, կարծես, այս ռազմագիտական փորձաքննությունը ընդհանրապես գոյություն չի ունեցել։
