Ես այդ պատվիրակության կազմում չեմ էլ եղել, որ իմանամ պարոն Ավինյանը ե՞րբ է նստել, ե՞րբ է վեր կացել, ե՞րբ պետք է ինչ-որ բան նկատեր կամ չնկատեր: Այս մասին լրագրողների հետ զրույցում ասաց Երևանի փոխքաղաքապետ Սուրեն Գրիգորյանը՝ անդրադառնալով Տիգրան Ավինյանի՝ ԱՄՆ կատարած այցի տոմսերի գներին:
«Կա հետևյալը՝ մեր ընդդիմադիր գործընկերները, մամուլը բարձրաձայնել են խնդիր, որ թանկարժեք է այդ տոմսը, որով պարոն քաղաքապետը մեկնել է ԱՄՆ: Քաղաքապետն էլ ասաց՝ երբ իմացել է, որ ինչ արժե տոմսը, համարել է, որ քննադատությունն օբյետկիվ է, արձագանքել է: Էլ ի՞նչ եք ուզում, որ քաղաքապետն անի»,- ասաց Գրիգորյանը:
Հարցին՝ եթե աղմուկ չբարձրանար չէիք իմանա՞ որ դա թանկ տոմս է, նա ասաց. «Այնպես չէ, որ կամայական որևէ աշխատող իրեն դուր եկած տեղից գնում է տոմս: Գոյություն ունի համապատասխան համակարգ, որի միջոցով այդ տոմսերը ձեռք են բերվում: Այս դեպքում ընթացակարգային առումով բան չի խախտվել: Այնպես չէ, որ ինչ-որ մեկը գնացել, իր բարեկամի ֆիրմայից գնել է այդ տոմսը, քանի որ պատշաճ ժամկետում չի գնվել, գնվել է հրատապ կարգով, եղել է այդ գինը, որը արդարացված չէ և քաղաքապետն իր դիրքորոշումը արտահայտեց»:
Հիշեցնենք, որ երեկ Երևանի քաղաքապետը հայտարարել էր՝ ապշած է եղել ԱՄՆ թռիչքի ծախսերից, ամբողջովին կփոխհատուցի ինքնուրույն:
Նշենք, որ Երևանի քաղաքապետի գլխավորած պատվիրակությունը նոյեմբերի վերջին շաբաթն անցկացրել էր Լոս Անջելեսում։ Ըստ քաղաքապետարանի՝ ամբողջ ուղևորության համար պետբյուջեից հատկացվել է 26 միլիոն 148 հազար դրամ։ 12,5 միլիոնը ծախսվել է տոմսերի համար։ Միայն 7 միլիոն 650 հազար դրամով բիզնես դասի տոմս էր գնվել քաղաքապետի համար: Մնացած շուրջ հինգ միլիոնով էլ գնվել էր ութ տոմս պատվիրակության մյուս անդամների համար։
