«Բեմ» ֆիլմն իմ կյանքում շատ բան փոխեց: Այն սովորեցրեց ինձ ամենակարևորը՝ համբերել, սպասել ու հավատալ»,- Tert.am Life-ի հետ զրույցում անկեղծացավ դերասանուհի Վիվյեն Բաստանջյանն, ով ստեղծագործական թիմի մյուս անդամների պես, երկար է սպասել այս պրեմիերային:
«Ռեժիսոր Հովհաննես Գալստյանի հետ ծանոթացել ենք այն ժամանակ, երբ նրանք Մարինե Զաքարյանի ֆիլմում դերակատար գտնելու համար եկել էին Գեղագիտության կենտրոնի Փոքր թատրոն: Այդ ընթացքում բարձրանում են տնօրենի աշխատասենյակ, որտեղ աֆիշի վրա տեսնում են իմ նկարը:
Հովհաննեսը միշտ ասում է, որ երբ տեսա, հասկացա, որ դա իմ Մարին է: Իսկ առաջին խոսակցությունից հետո, երբ մենք սրճարանում հանդիպեցինք ու ֆիլմը քննարկեցինք, ես ևս հասկացա, որ դա իմ Մարին է»,- պատմեց դերասանուհին:
Վիվյեն Բաստանջյանի համոզմամբ՝ լավ դերասանն այն դերասանն է, ով հարցեր չի տալիս և անկախ նրանից դրական կերպար է մարմնավորում, թե բացասական, եթե որոշեց, որ այս կերպարն իրենն է, պիտի մտածի այդ կերպարի մտքով։
«Այդ կերպարի միտքն է ամենակարևորը և ոչ՝ քո սեփականը։ Դու ինքդ ի՞նչ ես կարծում կերպարի գործողությունների ու արարքների հետ կապված, դա քո սեփական խնդիրն է։ Ես բացարձակ չեմ քննարկել իմ անձի անունից Մարիին»,- անկեղծացավ դերասանուհին, ով ցանկացած կերպար մարմնավորելիս միշտ աշխատում է նույն սկզբունքով: Այդ սկզբունքով նաև դասավանդում է իր ուսանողներին:
Ըստ նրա՝ բարդ կերպարներ չկան, եթե ունես այդ կերպարի միտքն ու արդարացնում ես նրա գործողությունները:
«Հովհաննես Գալստյանի նկարահանման հրապարակում բոլորն, ում հետ ես աշխատել եմ, իմ ընկերներն են, որոնց ես շատ լավ ճանաչում եմ:
Ես շատ հեշտ եմ մերվում յուրաքանչյուր թիմի հետ, ինչ տեսակ նախագիծ ուզում է լինի։ Այստեղ նույնը տեղի ունեցավ, առավելևս, որ մենք արել էինք փորձեր, իսկ կինոյում, եթե դու անում ես փորձ, նշանակում է շատ ավելի հեշտ է տրվելու աշխատանքը»,- մեզ հետ զրույցում պատմեց Վիվյեն Բաստանջյանը:
Դերասանուհին նշեց, որ ֆիլմում իր համար բարդ տեսարաններ չեն եղել, բայց շատ հուզական է եղել այն տեսարանը, երբ նկարահանվել է իր 50 օրական թոռնիկի հետ:
«Փոքր Ժանի կերպարը խաղացել է իմ թոռնիկը և դա ուղղակի շատ էմոցիոնալ էր ինձ համար այն իմաստով, որ փոքր երեխային բերել էինք նկարահանման հրապարակ:
Ամենահետաքրքիրն այն էր, որ այդ երեխան, բնականաբար, անկախ իրենից, անում էր բոլոր այն խնդիրները, ինչը որ Հովհաննեսը կուզեր իրեն տալ, եթե ինքը հասկացող լիներ»,- ասաց Վիվյենը:
Խոսելով իր կերպարի դրական կամ բացասական լինելու մասին՝ դերասանուհին նշեց, որ իր կարծիքով բոլոր կերպարներն էլ դրական էին այն առումով, թե ինչպես են իրենք կայացնում իրենց որոշումները։
«Ոչ միայն Մարին, այլ նաև մյուս հերոսները, ի վերջո, պատասխան տվեցին իրենց արած գործողությունների համար և արեցին իրենց ընտրությունը։ Մարին ընտրեց երեխային պահելու լուրջ և պատասխանատու առաքելությունը, չնայած, որ ինքը չէր ցանկանա դա անել միայնակ»,-նշեց դերասանուհին:
Եվ՛ թատրոնում, և՛ հեռուստատեսային նախագծերում ու ֆիլմերում տարբեր հերոսների մարմնավորած դերասանուհի Վիվեն Բաստանջյանը խոստովանեց, որ ցանկացած նախագծում աշխատում է նշաձողը երբեք չիջեցնել, իր հնարավորությունների սահմանում անել լավագույնը:
«Կուզեմ շատ նկարվեն նմանատիպ ֆիլմեր։ Թող Հովհաննես Գալստյանը շատ-շատ նախագծեր ունենա և այն հաճույքը, որը ես և ողջ թիմն ենք ստացել, թող բոլոր դերասաններն ունենան այդ պատիվը»,- ամփոփեց նա:
Ավելի վաղ, Tert.am Life-ն անդրադարձել էր «Բեմ» ֆիլմի երևանյան պրեմիերային, զրուցել ռեժիսորի և դերասանական կազմի հետ:
