Որպես կանոն ես ամեն օր օգտվում եմ տրանսպորտից, այսօրվա տրամադրությունները մի քիչ այլ են, որովհետև, այո, շատերը, հատկապես մեր տարեց բնակչությունը, ուղղակի չէր վճարում:
Այս մասին լրագրողների հետ զրույցում ասաց ԱԺ «Հայաստան» խմբակցության պատգամավոր Թադևոս Ավետիսյանը՝ անդրադառնալով տրանսպորտի թանկացմանը և այսօրվանից թանկացումը բոյկոտելու կոչերին:
«Մի տատիկի հետ էի խոսում, ասում է՝ 44,000 դրամ թոշակ է ստանում: Մարդը պարզ բան է ասում՝ գույքահարկս թանկացել է, աղբահանության վճարը թանկացել է, հիմա էլ տրանսպորտն է թանկացել: Ասում է՝ ես ամսական չորս-հինգ օր տանից դուրս եմ գալիս, օգտվում եմ տրանսպորտից։ Նախկինում վճարում էի 800 դրամ, հիմա այդ չորս-հինգ օրը օգտվելու համար առնվազն պիտի 50% ավել վճարի այս նոր սակագնով»,- ասաց նա։
Ավետսիյանը շեշտեց՝ 8 միլիոն դրամ ինքնաթիռի տոմս տվող քաղաքապետին, իհարկե, դժվար է հասկանալ 36,000 դրամ ստացողի վիճակը:
«Հիմա այդ մարդուն դժվար է հասկանալ, որ այո, 36,000 դրամ թոշակ ստացողի համար լրացուցիչ թեկուզ ամսական 5,000 դրամ ավել վճարելը ոչ թե բեռ է, այլ կենսական խնդիր է։ Հիմա սա է վիճակը, ավտոբուսի վարորդներն էլ շատ նորմալ են վերաբերում այս բոյկոտին, որովհետև իրենք էլ են տուժող: Մենք խոսել ենք նաև իրենց իրավունքների մասին, խախտված են նրանց իրավունքները ևս: Այդ գումարն ավելացնում են, որ ի՞նչ անեն, եթե ավտոբուսի վարորդը դժգոհ է, քաղաքացին դժգոհ է, ո՞վ է գոհ, միայն իրենք, ինչի են գոհ, որ ստանան բարձր աշխատավարձ, պարգևատրում, մեկ էլ յոթ-ութ միլիոնով Ամերիկա գնան, սա է ամբողջ իրականությունը, մնացածը ֆեյք է»,- ասաց պատգամավորը:
