Չինաստանի Առևտրի նախարարությունն արգելել է ԱՄՆ պատժամիջոցների ճանաչումը և կիրառումը հինգ չինական նավթաքիմիական ընկերության նկատմամբ, որոնք մեղադրվում են Իրանի հետ նավթի առևտրի մեջ։ Հայտնում է ՏԱՍՍ-ը։
«Չինաստանի կառավարությունը հետևողականորեն դեմ է միակողմանի պատժամիջոցներին, որոնք չունեն ՄԱԿ-ի մանդատ և չեն հիմնված միջազգային իրավունքի վրա։ Հետևաբար, Առևտրի նախարարությունը հրաման է արձակել, որով արգելվում է ԱՄՆ պատժամիջոցների ճանաչումը, կիրառումը հինգ չինական ընկերության նկատմամբ»,- նշվում է հայտարարության մեջ։
Նախարարությունը շեշտել է, որ ԱՄՆ գործողությունները անօրինականորեն սահմանափակում են բնականոն առևտրային գործունեությունը և խախտում են միջազգային հարաբերությունների հիմնական նորմերը։ Չինաստանի որոշումը հիմնված է օտարերկրյա օրենքների անհիմն արտատարածքային կիրառմանը հակազդելու իր ազգային մեխանիզմի վրա։
Ավելի վաղ ԱՄՆ-ն իր պատժամիջոցների ցուցակում ներառել էր հինգ չինական ընկերություն, այդ թվում՝ խոշոր նավթավերամշակող Hengli Petrochemical գործարանը, սառեցնելով նրանց ակտիվները և արգելելով գործարքները՝ իրանական նավթային գործարքներին մասնակցության պատրվակով։
