Այսօր Վաղարշապատ համայնքի ղեկավար Արգիշտի Մեխակյանը հանդիպում ունեցավ «Փոքրիկ քայլ» երաժշտական փառատոնի հիմնադիր Արտյոմ Հարությունյանի և փառատոնի կազմակերպիչների հետ։
Համայնքի ղեկավարը ողջունեց այն փաստը, որ 2019 թվականից ի վեր «Փոքրիկ քայլ» երաժշտական փառատոնն անցկացվում է Վաղարշապատ համայնքում՝ ընդգծելով դրա կարևոր դերը մշակութային կյանքի ակտիվացման և երիտասարդ տաղանդների բացահայտման գործում։
Ողջունելով մասնակիցներին և կազմակերպիչներին՝ Արգիշտի Մեխակյանը նրանց մաղթեց նորանոր հաջողություններ, ստեղծագործական ձեռքբերումներ և միջազգային հարթակներում նոր նվաճումներ։
Փառատոնի հիմնադիր Արտյոմ Հարությունյանը տեղեկացրեց, որ այս տարի «Փոքրիկ քայլ» երաժշտական փառատոնին մասնակցել է ավելի քան 1 500 մասնակից՝ Հայաստանի տարբեր մարզերից և համայնքներից։ Փառատոնին ներկայացված են եղել ավելի քան 150 արվեստի և երաժշտական դպրոցներ։
Նրա խոսքով՝ «Փոքրիկ քայլը» մասնակիցների թվով Հայաստանի ամենախոշոր երաժշտական փառատոնն է։
Հանդիպման ընթացքում անդրադարձ կատարվեց նաև առաջիկա միջոցառումներին։ Նշվեց, որ հուլիսի 17-ին կկայանա «Փոքրիկ քայլ» երաժշտական փառատոնի գալա համերգն ու մրցանակաբաշխությունը, որը կհամախմբի լավագույն մասնակիցներին և կդառնա փառատոնի հանդիսավոր եզրափակիչը։
