Սիրելի՛ հայրենակիցներ, բարեկամներ։
Արցախի ազատության համար զոհվածների հազարավոր մայրերի, հայրերի, հարազատների և մտերիմների խնդրանքը արտահայտելով՝ նախաձեռնող խումբը դիմում է բոլորիդ՝ առաջարկելով 2026 թվականի սեպտեմբերի 19-ին անցկացնել համազգային Հիշատակի օր՝ սգո երթով դեպի «Եռաբլուր» զինվորական պանթեոն։
1988-ից մինչև 2023 թվականը տևած պայքարի տարիների ընթացքում մենք կորցրել ենք տասնյակ հազարավոր մեր որդիներին, հայրերին, եղբայրներին, ամուսիններին, հարազատներին ու մտերիմներին։ Մենք կորցրել ենք սուրբ գերեզմաններ, եկեղեցիներ, տներ և մեր Հայրենիքը՝ Արցախը։
Մինչ օրս անհայտ է հարյուրավոր անհետ կորածների և գերեվարվածների ճակատագիրը։ Բանտերում տառապում են մեր հայրենակիցները, իսկ հազարավոր ընտանիքների սրտերը շարունակում են ապրել տագնապի և սպասման մեջ։
Մինչ օրս արյունահոսում են մեր սրտերը նաև 2023 թվականի սեպտեմբերի 25-ին Հայկազովում տեղի ունեցած ողբերգական պայթյունի զոհերի համար։ Այս մարդկանց հիշատակը չի կարող մատնվել մոռացության։ Մենք իրավունք չունենք մոռանալու։ Մենք իրավունք չունենք թույլ տալու, որ ժամանակը ջնջի նրանց անուններն ու ճակատագրերը, ովքեր իրենց կյանքը տվեցին մեզ համար։
Մեր լուռ սգո երթը՝ դիմանկարներով, դրոշներով ու ծաղիկներով դեպի յուրաքանչյուր շիրիմ, կլինի հարգանքի և հիշատակի տուրք Հայաստանի և Արցախի այն փառապանծ որդիներին ու դուստրերին, որոնց մենք պարտական ենք մեր կյանքով։ Խոնարհում յուրաքանչյուրի հիշատակի առաջ։
Դիմում ենք բոլոր հայրենակիցներին՝ խնդրելով տարածել այս կոչը, արտահայտել ձեր կարծիքը 2026 թվականի սեպտեմբերի 19-ին համազգային սգո երթ՝ «Հիշատակի օր» անցկացնելու վերաբերյալ, ինչպես նաև հայտնել ձեր պատրաստակամությունը՝ կոնկրետ աջակցություն ցուցաբերելու դրա կազմակերպմանը։
Լրացուցիչ կհայտնենք կապի տվյալները, հավաքի վայրն ու ժամը, ինչպես նաև երթի երթուղին։ Թող այս օրը դառնա ոչ թե բաժանման, այլ ընդհանուր հիշողության, ընդհանուր ցավի և ընդհանուր աղոթքի օր։
Հիշողությունը մեր պարտքն է։
Հիշողությունը մեր պատասխանատվությունն է նրանց հանդեպ, ովքեր այլևս մեզ հետ չեն։ Քանի դեռ մենք հիշում ենք՝ նրանք կենդանի են։ Խաղաղություն մեր Հայրենիքին՝ Հայաստանին։
Եվ Արցախի շուտափույթ վերադարձ։ Շնորհակալություն յուրաքանչյուրին, ով կլսի, կաջակցի և կմիանա։
Նախաձեռնող խումբ
