Փաշինյանը ՀՀ-ն ներքաշում է նոր և ոչ պակաս մասշտաբային արկածախնդրության մեջ: Այս մասին լրագրողների հետ զրույցում ասել է «Հայաստան» խմբակցության պատգամավոր Իշխան Սաղաթելյանը:
«Արցախը հայկական է և Նիկոլ Փաշինյանը այս իմաստով այն մարդը չի, որ պետք է որոշի Արցախը հայկական է, թե ոչ, ինքը բնականաբար շարունակում է սպասարկել Թուրքիայի և Ադրբեջանի վարած քաղաքականությունը և նրանց շահերը Հայաստանում: Ես նույնը ասել եմ և շարունակելու եմ պնդել, որ Արցախը հայկական է և Արցախի ժողովրդի հավաքական վերադարձի իրավունքը քննարկման կամ սակարկման ենթակա չէ։ Բոլոր միջազգային հանդիպումներում, բոլոր հնարավոր տեղերում մենք բարձրաձայնում ենք այդ խնդիրը, բայց հարցը առաջ չի գնում, այն շատ դժվար է միջազգային օրակարգում պահել, քանի որ դրա թիկունքում չկա պետություն, ու ոչ միայն չկա պետություն, այլ պետությունը դրան դեմ է աշխատում:
Այս իմաստով մենք փորձում ենք ամեն ինչ անել հարցը օրակարգում պահելու համար, բայց մշտապես հանդիպում ենք ոչ միայն Թուրքիայի և Ադրբեջանի կառավարությունների, այլ նաև Հայաստանի կառավարության հակահայկականությանը: Այս պահին խնդիրը հարցը պահելն է օրակարգում և թույլ չտալը, որ հարցը այդ ճանապարհով փակեն ու լեգիտիմացնեն Ալիևի արյունոտ ձեռքերը, Արցախում տեղի ունեցած էթնիկ զտումն ու ցեղասպանությունը»,- նշել է Սաղաթելյանը:
Անդրադառնալով գերիների հարցին՝ Սաղաթելյանը շեշտեց, որ առնվազն վերջին շրջանում կար երկու խոշոր հնարավորություն գերիների ազատման հարցը լուծելու.
«Անցած տարի Բաքվում տեղի ունեցած COP 29-ի միջոցառումն էր, մենք ամբողջ աշխարհով արշավ էինք սկսել, որ չի կարելի բռնապետական երկրում, գերիների ներկայության պայմաններում աշխարհի երկրների առաջնորդները լինեն Բաքվում, և փոքր աշխատանքի դեպքում հնարավոր էր միջոցառումից առաջ այդ հարցը լուծել, բայց չլուծվեց, այսինքն պետությունը այդ հարցով չի զբաղվում և դա փաստ է: Մեր բոլոր խնդիրները սկսվում են այնտեղից, որ Հայաստանի կառավարությունը հայկական շահերի հետ կապ չունի»,- ասել է նա:
Հիշեցնենք, որ այսօր Արցախի Հանրապետության Անկախության հռչակման օրն է: Բազմաթիվ քաղաքական և հասարակական գործիչներ այցելել են Եռաբլուր:
