Երկրում չկա գեթ մեկ ընտանիք, որի կարիքները հոգալու համար ծախս չի արվում պետական բյուջեից, հետևաբար մեր պետական բյուջեն յուրաքանչյուր քաղաքացու ընտանեկան բյուջեի անբաժանելի մաս է բառի ոչ թե փոխաբերական, այլ ուղիղ իմաստով: Այս մասին ԱԺ-ում 2025 թվականի պետական բյուջեի մասին օրենքի նախագծի նախնական քննարկման ժամանակ ասաց վարչապետ Նիկոլ Փաշինյանը:
«Չպետք է թույլ տալ, որ բարեկեցության մասին խոսակցությունը մարդիկ փորձեն մեկնաբանել իբրև ուտելու պրոցեսի քարոզչություն, հատկապես, որ հայտնի հանգամանքների բերումով մեզ մոտ ծայրահեղացված դրսևորումներ կան: Ուտելը բարեկեցության մաս է, հատկապես, որ միջազգային հարթակներում շատ է ընդգծվում, որ սննդին հասանելիությունը մարդու հիմնարար իրավունքներից մեկն է: Մարդու բարեկեցությունն ավելի համապարփակ հասկացություն է, որի մեջ մտնում է մարդու մշակութային կյանքի հասանելիությունից մինչև սննդի հասանելիությունը»,-ասաց նա:
Փաշինյանն ընդգծեց, որ որքան մեծ է պետական բյուջեն, այնքան մեծ է հանընդհանուր բարեկեցությունը: «Պետությունը միայն ու միայն սեփական քաղաքացիների համընդհանուր բարեկեցությունը ապահովելու գործիք է, կամ ժողովրդի լեզվով ասած՝ հաց վաստակելու գործիք է: Այսպես պետք է ընկալի պետությունն ինքն իրեն, ու այսպես պետք է ընկալեն քաղաքացիներն իրենց պետությունը, որովհետև, եթե պետության ժողովրդական ընկալումը սա չէ, ապա պետության գոյության հեռանկարը կասկածի տակ է»,- ասաց Նիկոլ Փաշինյանը:
