Միջազգային ատյաններից հայցերի հետ կանչումը, իհարկե, լրջորեն ազդելու է Արցախի այն բնակիչների, որոնք բռնի տեղահանվել են, իրավական պաշտպանության վրա: Այս մասին լրագրողների հետ զրույցում ասաց միջազգային իրավունքի մասնագետ, փաստաբան Արա Ղազարյանը:
Նա նշեց՝ դա է պատճառը, որ մասնավոր խմբերի արդեն նպատակը պետք է լինի որքան հնարավոր է շատ անհատական գանգատներ ուղարկել Եվրոպական դատարան:
«Քանի որ վստահ չեմ, որ այս խաղաղության պայմանագրում իրավական պաշտպանության արդյունավետ, չեմ ասում մեխանիզմներ, նույնիսկ սկզբունքներ սահմանված լինեն: Այդ դեպքում էլ արդեն լրջորեն հարց կբարձրանա այդ պայմանագրի սահմանադրականության հարցի վերաբերյալ, բայց առաջ չընկնենք դեռ: Բոլոր դեպքերում հիմա մեր խնդիրն է, որքան հնարավոր է շատ անհատական գանգատներ ուղարկել, ոչ միայն Եվրոպական դատարան, այլև միջազգային տարբեր տրիբունալներ, որովհետև իմ կարծիքով բռնի տեղահանված Արցախի բնակիչները կմնան առանց իրավական պաշտպանության, եթե հույսը դնեն միայն խաղաղության պայմանագրի վրա»,- շեշտեց նա։
Անդրադառնալով ապօրինի գույքի վերաբերյալ ՍԴ որոշմանը, նա ասաց, որ որոշումը բավական ընդարձակ է, դեռ պետք է լավ ուսումնասիրել այն:
«Ամենաշատը, որ ինձ հուզում է, որ վաղուց արդեն շփվում եմ Եվրոպական դատարանի նախադեպային իրավունքի հետ, որը նույնպես խիստ հակասական է, զարգացող է, որովհետև այդ թեման ընդհանրապես գլոբալ տիրույթում անընդհատ զարգանում է, սկսած 90-ականներից: Մեզ մոտ, իմ կարծիքով, ամենամեծ խնդիրը՝ երկուսը կնշեմ, մեկը օրենքի չափազանց երկար հետադարձ լուծումն է՝ մինչև 91 թվականը, և երկրորդ խնդիրը, որ քրեական գործի հետ զուգամիտում երբ որ լինում է, այստեղ արդեն երբեմն քաղդատավարությունը կարելի է կոնկրետ գործով, կոնկրետ հանգամանքներում համարել որպես քողարկված քրեական հետապնդում:
Սա նույնպես ՄԻԵԴ-ը բավականին լավ շոշափում է, բայց ՍԴ-ն շատ մակերեսային, թռուցիկ կերպով է այդ խնդրին անդրադարձել, այդ թվում նաև հետադարձելիությունը, հիմնականում նշելով, որ ինչ-ինչ պատճառներով կաշկանդված է վերացական վերանայման այս վարույթի շրջանակներում, խորությամբ անդրադառնալ»,- ասաց նա:
