ԱԺ-ում «Հայաստան» խմբակցության պատգամավոր Քրիստինե Վարդանյանի ելույթի ընթացքում իրավիճակը լարվեց։ Ընդդիմադիր պատգամավորը խոսում էր իշխանության օրոք կոռուպցիոն դրսևորումների մասին: Նա, դիմելով Հակակոռուպցիոն կոմիտեի նախագահին, հարց ուղղեց. «Սերգեյ Բագրատյանի կնոջ հանքից ի՞նչ կա։ ԱՆԻՖ-ի 25 միլիարդից ի՞նչ կա»: Վարդանյանն ասաց, որ ելույթն ընդհատել են, ու խնդրեք իր ժամանակը վերականգնել։ Սակայն, նիստը նախագահող Ալեն Սիմոնյանը դա թույլ չտվեց։
«Ես եմ որոշում, իմ հետ տենց խոսալ չի կարելի, տիկի՛ն Վարդանյան, ավարտվեց ձեր ելույթը, նստեք ձեր տեղը: Բանախոսը պիտի շուռ գա ԱԺ նախագահին ասի: Ես եմ այստեղ որոշողը»,- զայրացած ասաց Ալեն Սիմոնյանը:
Խորհրդարանի դահլիճից, սակայն մեկնաբանություններն ու քննարկումները շարունակվում էին: Տեղից միջամտում էր նաև «Հայաստան» խմբակցության պատգամավոր Արման Ղազարյանը:
Ի պատասխան նրա դիտարկումներին՝ Ալեն Սիմոնյանն ասաց. «Դու խելոք մնա»։ Ապա շարունակեց. «Կլռեք, երբ ասում եմ՝ լռեք, սա ԱԺ նիստերի դահլիճն է, ձեր հայաթը չի»:
Դիմելով «Հայաստան» խմբակցության պատգամավոր Արծվիկ Մինասյանին՝ Ալեն Սիմոնյանը հայտարարեց. «Կարգի հրավիրեք ձեր խմբակցությանը, թե չէ ես կհրավիրեմ»:
