Վեց երեխայի մայր արցախցի Անուշ Անդրյանի շրջափակման հետեւանքով չի կարողանում քաղցկեղ ունեցող 9-ամյա դստերը տանել Երեւան պարտադիր ստուգումների։
«Երեխային պետք են հետազոտություններ, մշտական հսկողություն, բայց մենք հիմա չենք կարողանում իրեն տեղափոխել Երեւան դա իրականացնելու համար։ Վերջին անգամ նոյեմբերին ենք արել հետազոտություն արել, բայց երեք ամիսը մեկ անելու կարիք կա, թե չէ հիվանդությունը գլուխ է բարձրանում»,- ասաց Անուշը։
Ընտանիքը Կարմիր խաչին դիմել է, սակայն կոմիտեից ասել են, որ կարող են երեխաներից միայն մեկին տեղափոխել, բայց այդ դեպքում էլ երեխաներին խնամող չի լինելու․ Անուշի ամուսինը զինծառայող է։ Բացի տեղափոխության հարցից խնդրահարույց է նաեւ երեխայի սննդի հարցը, որը պարտադիր պետք է վիտամիններով հագեցած լինի։
«Երեխայիս միրգ է պետք, միս, բայց չունենք։ Այս պահին աառնարանումս հաց է, մուրաբայի հյութ, տոմատ ու ծիծակ։ Ոչ մի բան չկա սնվելու։ Ժամերով հերթ ենք կանգնում մեկ կիլո խաղողի համար, բայց դեռ հարց է՝ կարող ենք գնել, թե՝ ոչ։ Հացի համար ժամը մեկին գնում ենք, հինգին նոր վերադառնում։ Երեկ ինը հաց ենք վերցրել, բայց երկու երեխաներիս հետ եմ գնացել, որովհետեւ միայն այդ քանակության հաց չէին տա»,- նշեց Անուշ Անդրյանը։
Ընտանիքը նաեւ տնտեսական պարագաներ չունի։ Լվացք անում է օճառով։ Սպասքը լվանում միայն տաք ջրով՝ առանց հեղուկի։
