ՌԴ ՀՕՊ համակարգերը Բրյանսկի, Սմոլենսկի և Տուլայի շրջանների օդային տարածքում ոչնչացրել են ևս չորս ուկրաինական անօդաչու սարք, հայտնում է ՌԴ ՊՆ-ն։ Սա կիրակի օրը խփված անօդաչու սարքերի թիվը հասցնում է 24-ի, հայտնում է ՏԱՍՍ-ը։
«Նոյեմբերի 26-ին, Մոսկվայի ժամանակով ժամը 09:30-ի սահմանում, Կիևի ռեժիմի կողմից Ռուսաստանի Դաշնության տարածքում գտնվող օբյեկտների վրա ինքնաթիռի տիպի անօդաչու թռչող սարքով ահաբեկչություն իրականացնելու փորձը կասեցվել է, հերթապահ հակաօդային պաշտպանության համակարգերը ոչնչացրել են չորս ուկրաինական անօդաչու թռչող սարքր՝ Բրյանսկի, Սմոլենսկի և Տուլայի շրջանների օդային տարածքում»,- ասվում է ՌԴ ՊՆ հաղորդագրությունում:
Նշենք, որ առավոտյան Մոսկվայի քաղաքապետ Սերգեյ Սոբյանինը Telegram-ի իր ալիքում գրել էր, որ ՀՕՊ ուժերը խոցել են Մոսկվայի ուղղությամբ թռչող մի քանի անօդաչու սարք:
«Այս գիշեր անօդաչուներով զանգվածային հարձակման փորձ է արվել: Այս պահին հակաօդային պաշտպանության ուժերը Նարո-Ֆոմինսկի շրջանում և Օդինցովո քաղաքային շրջանում դեպի Մոսկվա թռչող անօդաչու սարքեր են խոցել: ՀՕՊ-ին հաջողվել է նաև որսալ և ոչնչացնել մի քանի անօդաչուներ Բրյանսկի, Տուլայի և Կալուգայի շրջաններում»,- գրել է Սոբյանինը։
Այնուհետև նա հաղորդել է մեկ այլ անօդաչու թռչող սարքի մասին, որը փորձել է հարձակում իրականացնել Մոսկվայի վրա: Սարքը խփվել է Պոդոլսկի քաղաքային թաղամասում։
Սոբյանինը նշել է, որ, ըստ նախնական տեղեկությունների, ավերածություններ կամ զոհեր չեն եղել անօդաչուների բեկորների անկման հետևանքով։
ՏԱՍՍ-ը հավելում է, որ մոսկովյան «Վնուկովո» և «Դոմոդեդովո» օդանավակայանները կարճ ժամանակով դադարեցրել են ինքնաթիռների ընդունումն ու մեկնումը:Ավելի ուշ հայտնի է դարձել, որ երկու օդանավակայանն էլ վերսկսել են աշխատանքը։ Այս մասին են վկայում Flightradar24.com-ի և օդանավակայանի առցանց ցուցատախտակների տվյալները։
