ԱԺ ՔՊ-ական պատգամավոր Վաղարշակ Հակոբյանը լրագրողների հետ զրույցի ժամանակ ասաց, որ այսօր դժվարին վիճակում ենք գտնվում թե՛ անվտանգային, թե՛ բանակցային հարցերում, բայց մենք իրավունք չունենք հետ քայլ անել մեր խաղաղության օրակարգից։
Լրագրողները հարց ուղղեցին պատգամավորին, թե արդյո՞ք Ադրբեջանի կողմից ՀՀ-ին ներկայացված նախապայման է եղել, որպեսզի գերիների վերադարձի դիմաց ՀՀ-ն աջակցություն հայտնի ՄԱԿ-ի Կլիմայի փոփոխության մասին շրջանակային կոնվենցիայի Մասնակիցների կոնֆերանսի 29-րդ նստաշրջանը («COP29») հյուրընկալելու նպատակով Ադրբեջանի Հանրապետության ներկայացրած հայտին և հանի իր թեկնածությունը՝ պատգամավորը պատասխանեց, որ չի կարծում, թե նախապայման է եղել։ Սա երկուստեք պայմանավորվածության արդյունք է և ինքն էլ ողջունում է այդ քայլը։ Երկու երկրների մոտ փոխըմբռնում կա, որ խաղաղությունն այլընտրանք չունի։
