Բագրատ Սրբազանն Արցախի կառավարության անդամների, պատգամավորների հետ հանդիպման ժամանակ հայտարարեց, որ իր համար մի փոքր դժվար է խոսելը.
Նա ասաց, որ բացի ռացիոնալ մտքից, բանական մտքից, նաև չափազանց զգացմունքային է։ Գալուց առաջ մտածում էր, որ երանի այս հանդիպումների շարքը Երևանում տեղի չունենար, այլ տեղի ունենար Ստեփանակերտում, Գանձասարում, Հադրութում։ Արձանագրված իրավիճակ կա, այնուամենայնիվ։
Սրբազանը անդրադարձավ շարժման տրամաբանությանը, գաղափարներին։
Ըստ նրա՝ այս շարժումը սկսել է սահմանազատման ապօրինի գործընթացի պատճառով։ Շատ հաճախ իրենց փորձում են տեղափոխել տեղական նշանակության դաշտ, այդուհանդերձ, այն բացարձակ տեղական նշանակություն չունի, իրականում այն մեր երկրի ու ժողովրդի ճակատագրի հարցն է։ Կարևոր չէ՝ այն Ջերմուկում, Տավուշում, թե մեկ այլ վայրում է տեղի ունեցել։ Այն ամբողջությամբ հակասահմանադրական է։
Սրբազանը ասաց, որ օրակարգը, ըստ իրենց, կեղծ է, խաղաղության հասնելու կեղծ ներկայացում է, թե այն, իբր, հակադրվում է պատերազմին։ Իրենց այս շարժման բուն նպատակն իրական խաղաղություն ունենալն է՝ ֆիզիկական և մտքի։
«Պատերազմներն իրենք են բերել՝ իրենց ապաշնորհ լինելու պատճառով և շարունակաբար բերում են։ Ստի գործընթացը սկսվել է 2018 թվականից, գիտենք, թե ով է սուտն արտաբերողը»,- նշեց Սրբազանը։
