Հունահռոմեական ոճի ըմբիշ, աշխարհի չեմպիոն, Եվրոպայի եռակի չեմպիոն, 77 կգ քաշային Մալխաս Ամոյանը բրոնզե մեդալ է նվաճել Փարիզում անցկացվող Օլիմպիական խաղերում:
Վճռորոշ գոտեմարտում Ամոյանն ուժերն է չափել Ուզբեկստանը ներկայացնող հայ ըմբիշի՝ Արամ Վարդանյանի հետ և 6:5 հաշվով առավելության հասել մրցակցի նկատմամբ:
Հիշեցնենք՝ Ամոյանը ՕԽ քառորդ եզրափակչում 3:0 հաշվով առավելության էր հասել Ասիական խաղերի փոխչեմպիոն, Ասիայի չեմպիոն, Իրանի ներկայացուցիչ Ամին Կավիանինեջադի նկատմամբ, իսկ 1/8-ում ժամանակից շուտ հաղթել էր Ֆինլանդիայի ներկայացուցիչ Ջոնի Կունարի Սարկկինեին։ Կիսաեզրափակչում Մալխասը զիջել էր Ճապոնիայի ներկայացուցչին:
Հայաստանի օլիմպիական հավաքականի անդամ, Օլիմպիական Խաղերի ոսկե, արծաթե և բրոնզե մեդալակիր, հունահռոմեական ոճի ըմբիշ Արթուր Ալեքսանյանը Փարիզում անցկացվող Օլիմպիական խաղերում, Իրանի ներկայացուցիչ Մոհամադհադի Սարավիի հետ եզրափակիչ գոտեմարտում պարտվեց 4։1 հաշվով և նվաճեց արծաթե մեդալ։
Նա կրում է Օլիմպիական փոխչեմպիոնի տիտղոսը։
