Վրաստանի վարչապետ Իրակլի Կոբախիձեն մտադիր չէ հրաժարվել ուկրաինական պատերազմի թեմայից՝ «Վրացական երազանք» կուսակցության գովազդում։ Նա հայտարարել է, որ հիմնարար է համարում համեմատել Ուկրաինայի պատերազմն ու Վրաստանի խաղաղությունը։
Նախընտրական քարոզարշավի շրջանակներում իշխող «Վրացական երազանք» կուսակցությունը ներկայացրել է մի շարք փողոցային պաստառներ և տեսանյութ, որտեղ ավերակների վերածված ուկրաինական քաղաքները պատկերված են Վրաստանի խաղաղ քաղաքների կողքին։
Լրագրողները Կոբախիձեին հարցրել են, թե արդյո՞ք նրա համար բարեկամական ժեստ կլինի, եթե Ուկրաինան օգտագործի Սուխումի կադրերը ընտրական նպատակներով։
«Ես հիշում եմ, որ ուկրաինացիներն ակտիվորեն օգտագործում էին այդ կադրերը տարբեր նպատակներով, այդ թվում՝ հումորային, բայց դա այլ հարց է։ Այսօր մենք խոսում ենք ընդհանրապես պատերազմի հետևանքների և այն մասին, թե ինչից խուսափեցինք մեր երկրի համար 2022 թվականին»,- պատասխանել է Վրաստանի կառավարության ղեկավարը։
