Երեկ՝ նոյեմբերի 24-ին, «Գոյ» թատրոնի մուտքի դիմաց դերասանուհի Մարինե Պետրոսյանը՝ «Պատրանք և իրականություն» բացօթյա մոնոներկայացմամբ ներկայացավ հանդիսատեսին:
«Շնորհակալ եմ, որ ձեր կյանքից մի քիչ տվել եք, որպեսզի ներկա լինեք, որովհետև այս ներկայացումը հենց դրա մասին է: Աշխարհն ունի իր տարածքը և ժամանակը: Իմ մարմինը դա ես եմ և փորձել եմ այս ներկայացումով, որն իմպրովիզացիա է, իմ մարմնում ունենալ իմ անձնական տարածքը և ժամանակը: Ավանգարդ պար է, կոչվում է Բուտտո, սկզբում այն ուղղակի պարի տեսակ է եղել, հետո ճապոնացիներն ավելացրել են տարածություն, դարձել է Բուտտո: Գիտակցությամբ կամ ենթագիտակցությամբ զգալ քո անձնական ժամանակը ու դրա մեջ գոյել»,- ներկայացումից առաջ հանդիսատեսին ասաց Մարինե Պետրոսյանը:
Հիշեցնենք, նոյեմբերի 25-ին, ժամը 15:00-ին, Վարչական դատարանում տեղի կունենա կարևոր դատական նիստ։ Այս մասին տեղեկանում ենք «Գոյ» թատրոնի ֆեյսբուքյան էջում տարածած հայտարարության միջոցով:
«Այս գործընթացը ոչ միայն իրավական, այլև մշակութային արժեքների և ստեղծագործական իրավունքի պաշտպանության հարց է։
«Գոյ» թատրոնը որպես հայկական արվեստի կարևորագույն կենտրոն` կանգնած է իր գոյատևման համար պայքարի ճանապարհին։ Մենք համոզված ենք, որ այս նիստը ոչ միայն մեր, այլև ամբողջ հայկական մշակույթի համար է՝ որպես ազգային և ինքնատիպ թատրոնի իրավունքների պաշտպանություն»,- նշված է հայտարարության մեջ:
Ավելի վաղ հայտնել էինք, որ կառավարության որոշմամբ «Գոյ» թատրոնը միավորվել է Գ. Սունդուկյանի անվան ազգային ակադեմիական թատրոնին, սակայն «Գոյ» թատրոնի դերասանական ու ստեղծագործական կազմը դեմ է այդ միավորմանը, իրենք ուզում են որպես առանձին թատրոն հանդես գալ, չեն ուզում գնալ ու աշխատել Սունդուկյանի անվան ակադեմիական թատրոնում։ Նրանք միավորման վերաբերյալ կառավարության որոշումը վիճարկում են դատարանում։
