Երկու օր առաջ հայտարարել էինք, «Հայաքվե» քաղաքացիական միավորումը միանում է Երևանի բնակչության և քաղաքային ավագանու ընդդիմադիր խմբակցությունների կողմից հայտարարված բոյկոտի գործողություններին` ուղղված հանրային տրանսպորտի սակագնի անհիմն բարձրացման դեմ։ Այս մասին ասաց «Հայաքվե» նախաձեռնության համակրգող Ավետիք Չալաբյանը:
«Տառացիորեն մեկ օր հետո Երևանի քաղաքապետի պաշտոնը զբաղեցնող Տիգրան Ավինյանը, տեղի տալով հանրային ահագնացող ճնշմանը, հայտարարեց, որ նա պատրաստ է իջեցնել սակագները մինչև 150 դրամ։ Այս կապակցությամբ մենք ուզում ենք հայտարարել հետևյալը, նախ սակագները Երևանի քաղաքապետի որոշման հարցը չեն, այլ ամբողջ քաղաքային ավագանու, ուստի մենք սպասենք նրան, որպեսզի տեղի ունենա Երևանի քաղաքային ավագանու նիստը, որով կհաստատվեն տնտեսապես հիմնավորված և Երևանի բնակչության շահերից ելնող սակագներ։
Երկրորդը, երեկվա իրադարձությունները ցույց են տալիս, որ սակագնային ամբողջ քաղաքականությունը ի սկզբանե անհիմն էր, իսկ այդ քաղաքականությունն առաջ մղող Երևանի քաղաքապետի պաշտոնը զբաղեցնող Տիգրան Ավինյանը և նրա տեղակալները, ի սկզբանե մոլորության մեջ էին մտցնում մեր բնակչությանը, չունեին հստակ հաշվարկներ և վերածել էին այս ամբողջը առևտրի առարկայի, որը խիստ դատապարտելի է։
Ուստի մենք կարծում ենք, որ բոյկոտի գործողությունները պետք է շարունակվեն, մեր բնակչությունը մինչև օրինական, իրավական ճանապարհով սակագների հաստատումը պետք է որևէ սակագին չվճարի սպասի մինչև կընդունվեն համապատասխան որոշումներ, որոնք ընդունելի կլինեն ամբողջ բնակչության համար»,- ասաց Չալաբյանը։
«Հայաքվե» նախաձեռնության անդամները կոչ արեցին քաղաքացիներին հանրային տրանսպորտից օգտվելու դեպքում չվճարել, չվճարելու դեպքում համապատասխան տույժի ենթարկվելու դեպքում տույժի կտրոնը ներկայացնել «Հայաքվեի գրասենյակ»,՝ Աբովյան 20 հասցեով, ներկայացնելու դեպքում քաղաքացիները կստանան դրամական փոխհատուցումը։
