Նախադպրոցական կրթության մեջ երեխաների ընդգրկվածության ոլորտում լուրջ հաջողություններ ունենք: 500 մանկապարտեզների և նախակրթարանների կառուցման, վերակառուցման, հիմնանորոգման ծրագրով իրականացվող աշխատանքների արդյունքում նկատելիորեն մեծացել է նախադպրոցական հաստատություններում սովորողների թիվը: Լուրերի փոխանցմամբ, այս մասին Կառավարության՝ հունվարի 30-ի նիստին ասաց ԿԳՄՍ նախարար Ժաննա Անդրեասյանը:
Ըստ նախարարի՝ այս պահին կա 3-5 տարեկան ավելի քան 82 հազար երեխա՝ ընդգրկված նախադպրոցական հաստատություններում, որը շուրջ 75 տոկոսն է տվյալ տարիքային խմբի: 2022 թվականին այս ցուցանիշը եղել է 63,6 տոկոս, այսինքն՝ 2 տարվա ընթացքում ապահովվել է շուրջ 12 տոկոս աճ, իսկ 2017 թվականի համեմատ՝ շուրջ 20 տոկոս աճ:
Սակայն, ըստ նախարարի, խնդրահարույց է մնում մսուրի ծառայությունը. դրա ընդլայնման կարիք կա: Ըստ այդմ՝ ԿԳՄՍՆ-ն առաջարկում է մեկնարկել փորձնական ծրագիր, որով կփոփոխվի նախադպրոցական ուսհաստատությունների ֆինանսավորման կարգը:
«Նախատեսում ենք, որ 10 խմբի շրջանակում, այսինքն՝ շուրջ 200 երեխաների համար, սկսել նոր ծրագիր, որն իրականացվելու է մի շարք համայնքներում: Համայնքները և հաստատություններն ընտրվել են ՏԿԵՆ-ի և Երևանի քաղաքապատերանի հետ քննարկման արդյունքում:
Փորձնական ծրագրի համար կունենանք 4 հաստատություն Երևանում, որոնցից մեկում կսկսենք 6-12 ամսականների 1 խմբի կրթության ծրագիրը. Վանաձորում և Գյումրիում՝ 2-ական, իսկ Հրազդանում՝ 1-ական հաստատություններ, որտեղ արդեն, 1 տարեկանից սկսած, երեխաները մսուրի ծառայության մեջ կընդգրկվեն»,- ասաց նա:
Ծրագրի արժեքը գնահատվել է շուրջ 175 մլն դրամ: Նախարարը նաև տեղեկացրեց, որ Հայաստանում մսուր-մանկապարտեզները 2 տարեկանից են, բայց կան նաև նախադեպեր, որ 6 ամսականից են:
Վարչապետ Նիկոլ Փաշինյանը կարևորեց հատկապես որոշման նախագծի տնտեսական բաղադրիչը:
«Երիտասարդ մայրիկների համար հնարավորություն է ստեղծվում, որ կա՛մ վերադառնան հնարավրինս շուտ աշխատանքի շուկա, կա՛մ դրսևորվելու հնարավորություն ունենան»,- ասաց Փաշինյանը՝ միաժամանակ կարևորելով որոշումը պատշաճ ձևով կոմունիկացնելու հարցը:
