Հնդկաստանի վարչապետը հետաձգել է այցը Եվրոպա Պակիստանի հետ լարվածության ֆոնին

Հնդկաստանի վարչապետ Նարենդրա Մոդին հետաձգել է մայիսի կեսերին նախատեսված այցը Խորվաթիա, Նորվեգիա և Նիդեռլանդներ։ Այս մասին հայտնում են հնդկական ANI լրատվական գործակալությունը և India հեռուստաալիքը՝ վկայակոչելով աղբյուրներ։

«Որոշումն ընդունվել է՝ հաշվի առնելով Հնդկաստանի և Պակիստանի միջև լարվածության աճը», — հաղորդում է India TV-ն:

Անցած գիշեր Հնդկաստանի պաշտպանության նախարարությունը հայտարարել է «Սինդուր» գործողության մեկնարկի մասին, որի ընթացքում հնդկական զինված ուժերը հրթիռային հարվածներ են հասցրել Պակիստանին, Ջամու և Քաշմիրի տարածքին, որը Նյու Դելին համարում է Պակիստանի կողմից օկուպացված: Հնդկաստանի իշխանությունները գործողությունը բացատրել են զինյալների հարձակումները կանխելու ցանկությամբ։

Նյու Դելին պնդում է, որ հարձակումներն իրականացվել են «ահաբեկչական ճամբարների» վրա, ներառյալ «Ջեյշ-է-Մուհամեդ» խմբավորման հենակետը  Բահավալպուրում և Լաշկար-է-Թայբա շարժման բազան Մուրիդկեում:

Երկու երկրների միջև հակամարտությունը սրվել է ապրիլի 22-ին Ջամու և Քաշմիրում տեղի ունեցած ահաբեկչությունից հետո, որից հետո զինված պակիստանցիները կրակ են բացել զբոսաշրջիկների վրա։ Զոհվել է 26 մարդ, այդ թվում՝ 25 հնդիկ և մեկ զբոսաշրջիկ Նեպալից։ Դրանից հետո երկու երկրների ղեկավարները հայտարարել են ռազմական գործողությունների պատրաստակամության մասին։