Ես կարծում եմ, որ վարչապետի գրառումը ձեր բոլոր հարցերի պատասխանները պարունակում է, ավելացնելու ոչինչ չունեմ։ Այս մասին ԱԺ-ում լրագրողների հետ զրույցում ասաց ԿԳՄՍ նախարար Ժաննա Անդրեասյանը՝ անդրադառնալով Փաշինյանի՝ խումբ ստեղծելու և Վեհափառին Վեհարանից հեռացնելու կոչին:
«Արված գրառումը պարունակում է տեղեկատվություն թե չափանիշների, թե ընտրության մեխանիզմի մասին, ավելացնելու ոչինչ չունեմ»,- ասաց նա։
Հարցին՝ օրինակ՝ Նիկոլ Փաշինյանն ասում է՝ Աստծո օգնությամբ ենք նաև ընտրություն անելու, Ձեզ համար հասկանալի՞ է՝ ինչ ձևով է լինելու այդ ընտրությունը, նա պատասխանեց. «Աստծո օգնությո՞ւնը, Դուք եկեղեցու հետևո՞րդ եք, Ձեզ պիտի բացատրե՞լ Աստծո օգնությունն ինչ է նշանակում։ Ես կարծում եմ՝ եթե դուք եկեղեցու հետևորդ եք, այդ հարցը պիտի չտաք: Ես կարծում եմ՝ հավատացյալ մարդու համար «Աստծո օգնություն» բառերը շատ հասկանալի են, եթե դուք ձեզ չեք համարում հետևորդ, խնդրեմ, իհարկե, կան մարդիկ ովքեր հետևորդ չեն, այդ դեպքում գուցե բացատրության կարիք կա»:
Ինչ վերաբերում է հարցին՝ Փաշինյանն ասել է՝ կաթողիկոսը զավակ ունի և եթե հերքի, ինքը կապացուցի, գիտե՞ք ինչ կերպ է ապացուցելու, Անդրեասյանը ծիծաղեց և ասաց լրագրողներին. «Դուք ձեր հարցին ինչպե՞ս կպատասխանեք, դե պատասխանեք ձեր հարցին»:
