«Խրախճանք ժանտախտի ժամանակ»․ 41,5 միլիարդ դրամ պարգևավճար՝ սոցիալական ճգնաժամի պայմաններում
Հայաստանի վարչապետի աշխատակազմը և 10 նախարարությունները վերջին հինգ տարիներին ստացել են 41 միլիարդ 530 միլիոն դրամ պարգևավճարներ և խրախուսումներ։ Տվյալները հրապարակել է «Hetq»-ը։ Մինչդեռ սոցիալական վիճակը շարունակում է ծանր մնալ, և հազարավոր քաղաքացիներ, հատկապես թոշակառուներ, կանգնած են կենսական խնդիրների առաջ։
2025 թվականին պարգևավճարների հիմնական մասը՝ 67,95 տոկոսը, բաժին է հասել Ներքին գործերի նախարարությանը։ Էկոնոմիկայի նախարարությունը ստացել է 5,91 տոկոս։ Նույն թվականին 351 աշխատակից ստացել է ընդհանուր 614 մլն 430 հազար դրամ պարգևավճար։ Պաշտպանության և Արտաքին գործերի նախարարությունների տվյալները հաշվարկներում ներառված չեն։
Փոխարժեքի հաշվարկով ընդհանուր գումարը մոտենում է 110 միլիոն դոլարի։ Սա խոշոր ծավալ է այնպիսի երկրի համար, որը շարունակում է պայքարել սոցիալ-տնտեսական խնդիրների և մարդկային կապիտալի զարգացման ցածր մակարդակի դեմ։
Ստացվում է, որ մոտ 500 հազար թոշակառու կարող էր ստանալ շուրջ 82 հազար դրամ հավելում, եթե պարգևավճարների գումարները ուղղվեին սոցիալական նպատակների։ Այս հաշվարկը սուր հակադրություն է ստեղծում սոցիալական արդարության մասին հնչող քաղաքական հայտարարությունների հետ։
