Ով ասում է հարուստ եմ, ուժեղ եմ, թող իր համար ճանապարհ կառուցի, հարուստ են՝ թող օդանավակայան կառուցեն, «Զվարթնոցից» չօգտվեն: Այս մասին Կառավարության նիստի ժամանակ ասել է վարչապետ Նիկոլ Փաշինյանը:
«Հարկը առանց բացառության մեր բոլորի բարեկեցությունն է՝ ամենահարուստից սկսած, ամենաաղքատից վերջացրած: Մարդը կարող է Բենթլի և Ռոլս Ռոյս ունենա, բայց մեկ է, ինչքան էլ հարուստ լինես, չես կարող քեզ համար Երևան-Սևան, կամ Երևան-Բագրատաշեն առանձին մայրուղի ունենալ, չկա այդպիսի մարդ։ Հայաստանի Հանրապետությունում ամենահարուստը Հայաստանի Հանրապետությունն է: Դե հարուստ են, թող իրենց համար օդանավակայան կառուցեն, Հայաստանի Հանրապետության հանրային օդանավակայաններից թող չօգտվեն, իրենց համար այլընտրանքային ճանապարհ կառուցեն:
Հարուստները ու՞ր են գնում, չգիտեմ, Ծաղկաձոր են գնում, ուր են գնում, թող իրենց տնից մինչև օդանավակայանը ճանապարհ կառուցեն, սրանից հետո տենց պետք է ասել: Ով ասում է հարուստ եմ, ուժեղ եմ, ես էլ ասում եմ՝ դե կառուցիր քեզ համար ճանապարհ, օդանավակայան, ուր գնում ես գնա միայն քո կառուցած ճանապարհով: Եթե պետությունը այդ ճանապարհները չկառուցի, ձեր բենթլիներից հետևի ստոփ ֆառն է մնալու, ուրիշ ոչ մի բան չի մնալու։ Նույնն էլ վերաբերվում է աղքատներին, որ հարկ չվճարեն, նպաստ կա, առողջության հարց կա, մենք որտեղի՞ց կվճարենք:
Ամենահարուստը և ամենաաղքատը այդ կապով են կապված, երկրում հարկային համակարգ և հարկային համակարգի ծախսման մեխանիզմ կա, թե՞ ոչ, հարուստը չի կարող բարեկեցիկ կյանքով ապրել, եթե պետությունը իր գործառույթները բյուջետային ծախսերի միջոցով չիրականացնի։ Սա պարզ գիտակցում է, որը պետք է կարողանանք հնարավորինս լայնորեն տարածել մարդկանց մեջ»,- նշել է Փաշինյանը:
