Իրանի իշխանությունները միշտ պատրաստ են երկխոսության, սակայն այն իմաստ ունի վարել միայն իրատեսական դիրքերից, ուրբաթ հայտնել է Իրանի դատական իշխանության ղեկավար Ղոլամ Հոսեյն Մոհսենի-Էջեին։
«Իրանի Իսլամական Հանրապետությունը երբեք չի խուսափել բանակցություններից։ Մենք միշտ ողջունել ենք դրանք, սակայն միայն այն բանակցությունները, որոնք հիմնված են տրամաբանության և բանականության վրա։ Մենք չենք ընդունում ճնշումն ու պարտադրված պայմանները»,- նրա խոսքերը մեջբերել է Press TV-ն։
Մոհսենի-Էջեիի խոսքով, եթե Իրանի հակառակորդներին չի հաջողվել իրենց նպատակներին հասնել սպառնալիքներով և մարտի դաշտում, ապա դա չի ստացվի նաև բանակցությունների սեղանի շուրջ։ Նա նաև ասել է, որ իրանական իշխանությունները կշարունակեն իրավական գործողությունները, այդ թվում՝ միջազգային հարթակում, ԱՄՆ-ի և Իսրայելի կողմից Իրանի վրա հարձակման հետ կապված, և որ նրանք մտադիր են դատարանի առաջ կանգնեցնել այս քայլի պատասխանատուներին ու փոխհատուցում ստանալ։
Անցած շաբաթվա վերջին ԱՄՆ նախագահ Դոնալդ Թրամփը հայտնել էր, որ Իրանի հետ առերես բանակցությունների նպատակով կատարվող ուղևորությունները շատ ժամանակ և միջոցներ են խլում, ուստի կնախընտրեր հեռախոսային շփումը։ Վաշինգտոնի և Թեհրանի ներկայացուցիչների առերես բանակցությունների նոր փուլը, որը սպասվում էր անցած հանգստյան օրերին Իսլամաբադում, չի կայացել։
The New York Times թերթը ապրիլի 28-ին, հղում կատարելով մի քանի աղբյուրների, որոնք ծանոթ են Սպիտակ տան իրավիճակային կենտրոնում ընթացող քննարկումներին, հայտնել էր, որ Թրամփը չի ընդունի Իրանի առաջարկը, որը նախատեսում է Հորմուզի նեղուցի բացումը, սակայն Թեհրանի միջուկային ծրագրի հարցը թողնում է հետագա բանակցությունների համար։ Ավելի ուշ Թրամփը վստահեցրել էր, որ իրենից և ևս մի քանի մարդկանցից բացի ոչ ոք տեղեկացված չէ Իրանի հետ բանակցությունների իրական կարգավիճակի մասին։
