«Հայաստանը ես եմ» քաղաքական նախաձեռնության ղեկավար Նաիրի Սարգսյանը գրում է․
Մայիսի 28-ը պետական կամքի, ինքնիշխանության և ազգային արժանապատվության վերածննդի օրն է։
1918 թվականին հռչակվեց Հայաստանի Հանրապետությունը՝ ցեղասպանությունից, քայքայումից և պատերազմից հետո։ Պետությունը ստեղծվեց ոչ թե շնորհիվ, այլ հակառակ բոլոր հանգամանքների։
Սա է մայիսի 28-ի իրական խորհուրդը՝ պետություն կառուցել նույնիսկ այն ժամանակ, երբ թվում է՝ ամեն ինչ կորած է։
Այսօր, ցավոք, հաճախ փորձում են պետական տոները վերածել ձևական միջոցառումների, գեղեցիկ կադրերի և քաղաքական PR-ի։
Բայց պետությունը չի կառուցվում բեմադրություններով։ Պետությունը կառուցվում է պատասխանատվությամբ, ուժեղ ինստիտուտներով, ազգային արժանապատվությամբ, ազգային արժեքներով և անվտանգությունն առաջնահերթ համարող իշխանությամբ։
Անկախությունը չի պահպանվում հայտարարություններով։ Այն պահպանվում է պետական մտածողությամբ, ուժեղ բանակով, ազգային միասնությամբ և սեփական պետության նկատմամբ պատասխանատվությամբ։
Հայաստանը վերականգնելու է ուժեղ պետականությունը։ Ոնենալու ենք պետություն, որտեղ ազգային խորհրդանիշները ծառայելու են ոչ թե իշխանության վարկանիշին, այլ հայկական պետականության ամրապնդմանը։
Փա՛ռք Առաջին Հանրապետության հիմնադիրներին։
Փա՛ռք բոլոր նրանց, ովքեր պայքարել և պայքարում են հայկական պետականության համար։
