ՀՀԿ ԳՄ անդամ Արտակ Զաքարյանը գրել է.
«Զավեշտ է ու ողբերգություն. հիմա էլ ուրիշ բանի համար են երդվում:
2021թ.-ին Նիկոլի ձևավորված աղետաբեր կառավարությունն իբրև թե երդվել էր «Հանուն համազգային նպատակների իրականացման և հայրենիքի հզորացման…»
(ըստ օրենքում ամրագրված տեքստի):
Արտաքին տերերի թելադրանքով մեր համազգային նպատակները ձախողելուց, ոտնահարելուց և դավադիր քաղաքականության արդյունքում թշնամուն հանձնելուց հետո, հիմա էլ որոշել են ուրիշ բանի համար երդվել:
2021թ. կառավարությունը երդվում էր, որ Արցախը հայկական պետք է լիներ, նրա ինքնորոշման իրավունքն ու կարգավիճակը ԵԱՀԿ քննարկման հարցեր պետք է լինեին, որ արցախցին Արցախում պետք է ապրեր…
(Կառավարության գործունեության 2021-26թթ. ծրագիր):
Դրժե՞լ են արդյոք երդումը․ թող իրենք ասեն:
2021թ․ նրանց երդումը ենթադրում էր նաև, որ պետք է հարգվեր ՀՀ Սահմանադրությամբ Հայ Առաքելական Սուրբ եկեղեցու բացառիկ առաքելությունը: Նրա միաբանության ու ինքնավարության դեմ պետական մակարդակով արշավանքներ չպետք է արվեին:
Դրժե՞լ են արդյոք երդումը․ թող իրենք ասեն:
2021թ․ նրանց երդումը ենթադրում էր, որ Հայաստանի և Սփյուռքի միջև գործակցությունը, Հայոց Ցեղասպանության միջազգային ճանաչման օրակարգերը, հավասարակշռված արտաքին քաղաքականությունն ու անվտանգությունը պետք է առաջնահերթություններ լինեին (Կառավարության գործունեության 2021-26թթ. ծրագիր):
Հանուն համազգային նպատակների և հզոր Հայաստանի երդում տված կառավարությունն այսօր հրաժարվել է համազգային նպատակներից: Հայրենիքի հզորացման համար երդում տված կառավարությունն անգամ «հայրենիք» բառի ընկալումից է սկսել վախենալ՝ այն փոխարինելով «իրական Հայաստանով»:
Այժմ որոշել են փոխել տեքստը: Ու երդումը դրժածները նոր տեքստով երդում են պատրաստվում տալ: Էլ չեն ուզում երդվել հանուն համազգային նպատակների, որովհետև դրանք գրեթե ոչնչացրել են:
Հիմա ցանկանում են երդվել «Հանուն Հայաստանի Հանրապետության հարատևության, ինքնիշխանության և զարգացման…», ինչպես նաև երդվելու են «…գործել ի շահ ներկա ու ապագա սերունդների»:
Աստծո սիրուն, կլինի՞ չերդվեք: Կյանքը ցույց է տալիս, որ ձեր երդումներից հետո մեր ժողովուրդը միայն կորուստ, ավեր ու ձախողում է ունեցել»:
