«Ուժեղ Հայաստան» խմբակցության պատգամավոր Անդրանիկ Գևորգյանը ԵԽԽՎ-ի՝ Հայաստանում կայացած խորհրդարանական ընտրությունների դիտարկման զեկույցը որակել է որպես ուղիղ և ծանր ապտակ՝ Հայաստանի իշխանություններին։
Ընդդիմադիր պատգամավորը, մասնավորապես, նշել է․
«ԵԽԽՎ աշնանային նստաշրջանում քննարկվել են Հայաստանում 2026 թ. հունիսի 7-ին կայացած խորհրդարանական ընտրությունները, և եվրոպական հարթակից հնչել է հստակ, աներկբա գնահատական՝ ընտրությունները չեն եղել հավասար և արդար։
ԵԽԽՎ պաշտոնական զեկույցում արձանագրված է մի իրողություն, որն իշխանությունը փորձում էր կոծկել.
Իշխող ուժը բացահայտ օգտագործել է կառավարական պաշտոնական հարթակները, շահագործել է հանրային ենթակառուցվածքները, գործի է դրել վարչական ողջ ռեսուրսը՝ սեփական քարոզարշավն առաջ մղելու համար։
Զեկույցում ուղիղ նշվում է՝ սա զգալիորեն խաթարել է քարոզարշավը և զրկել ընդդիմադիր ուժերին հավասար պայմաններում մրցելու հնարավորությունից։
Երբ «ժողովրդավարության բաստիոնի» մասին իշխանության հորինած հեքիաթները հօդս են ցնդում միջազգային զեկույցների առաջ, մնում է փաստը՝ իշխանությունը հերթական անգամ պետական լծակներն ու հանրային միջոցները ծառայեցրել է սեփական աթոռը պահելուն։
Սա միջազգային մակարդակի «ապտակ» էր Հայաստանի ժողովրդավարական իմիջին»։
