ՀՀ վարչապետ Նիկոլ Փաշինյանը դատական հայց է ներկայացրել պատգամավոր Էդգար Ղազարյանի դեմ։ Գործը քննվելու է Երևանի քաղաքացիական դատարանում, դատավոր՝ Մարինա Տաշչյան։
Դատական տեղեկատվության համաձայն՝ Փաշինյանը պահանջում է պարտավորեցնել Էդգար Ղազարյանին հրապարակային հերքել 2026 թվականի սեպտեմբերի 27-ին տված հարցազրույցի ընթացքում իր հասցեին հնչեցրած հայտարարությունը, որը հայցվորը զրպարտություն է համարում։
Խոսքը Ղազարյանի հետևյալ հայտարարության մասին է․ «Ադրբեջանական առաջխաղացումը, պաշտպանական բնագծի ճեղքում և առաջխաղացումը եղել ա ընդամենը 2020 թվականի հոկտեմբերի 6-ից հետո, երբ որ Նիկոլ Փաշինյանը գնաց Ստեփանակերտ, ընդեղ անցկացրեց խորհրդակցություն հրամանատարաշտաբային կետում, վերադարձավ, սկսեց թշնամուն ուղիղ տեղեկություններ տալ»։
Փաշինյանը դատարանից պահանջում է պարտավորեցնել Ղազարյանին այդ տեղեկությունները հերքել՝ հայտարարելով, որ դրանք «ամբողջությամբ սուտ են, չեն համապատասխանում իրականությանը և զրպարտում են ՀՀ վարչապետ Նիկոլ Փաշինյանին»։
Հայցով առաջարկվում է հերքումը տարածել «Նյուզ Էյ Էմ» լրատվական ընկերության միջոցով՝ ուղիղ եթերում տեսաձայնագրման եղանակով։
Բացի այդ, հայցվորը պահանջում է Էդգար Ղազարյանից հօգուտ իրեն բռնագանձել 6 մլն ՀՀ դրամ՝ որպես փոխհատուցում։
