Նոյեմբերի 13-ին AntiFake.am-ն անդրադարձել էր Պեմզաշենի սահմռկեցուցիչ սպանության կասկածյալների վերաբերյալ ֆեյսբուքյան արձագանքներին։ Կասկածյալներից մեկի՝ Արկադի Բարսեղյանի ֆեյսբուքյան էջն ուսումնասիրելիս պարզ էր դարձել, որ նա Նիկոլ Փաշինյանի իշխանության աջակից է, ինչպես նաև մասնակցել է 2018 թվականի փողոցային իրադարձություններին։ Նիկոլ Փաշինյանի աջակցին ուղղված ֆեյսբուքյան օգտատերերի բնական կոշտ արձագանքը կարծես անհանգստացրել է Նիկոլ Փաշինյանին ու նրա կնոջը՝ Աննա Հակոբյանին պատկանող «Հայկական ժամանակին»։
Փաշինյանի ընտանեկան թերթը ստանձնել է Արկադի Բարսեղյանի շահերի պաշտպանի դերը։ «ՀԺ»-ն սահմռկեցուցիչ իրադարձությունների մասին զրուցել է Պեմզաշենի մի բնակչի հետ։ Անդրադառնալով սպանության մեջ կասկածվող և ձերբակալված ազգականներ Արկադի Բարսեղյանին և Վրույր Բարսեղյանին՝ կայքը առանձնահատուկ ընդգծել է մի պեմզաշենցու կարծիք, ով չի հավատում, որ Արկադի Բարսեղյանը կարող էր նման ոճրագործություն իրականացնել։ Այդ նույն պեմզաշենցին բացասական կարծիք է արտահայտել մյուս կասկածյալի՝ Վրյուր Բարսեղյանի մասին։
Ուշագրավ է, որ Պեմզաշենի մեկ բնակչի կարծիքը Արկադի Բարսեղյանի մասին Փաշինյանի ընտանեկան կայքը ներկայացնում է ընդհանրացված կերպով՝ որպես Պեմզաշենի ամբողջ բնակչության կարծիք։ «Նրանցից մեկի՝ Արկադի Բարսեղյանի մասով գյուղում լուրջ կասկածներ կան։ Չեն պատկերացնում, որ կարող էր նման քայլի գնալ»,- գրել է «ՀԺ»-ն։
«Հայկական ժամանակը» պարտակու՞մ է Նիկոլ Փաշինյանի իշխանության աջակից Արկադի Բարսեղյանին, որի մասին մեկ պեմզաշենցու հայտնած կարծիքը որպես ընդհանրացված կարծիք է ներկայացնում։ Արդյո՞ք Նիկոլ Փաշինյանին պատկանող կայքի այս կարճ հրապարակումը իրավապահներին հետ կպահի անաչառ և օբյեկտիվ քննություն իրականացնելուց։ Սպասենք զարգացումներին…
Աղբյուր՝ AntiFake.am
