Վազգեն Սարգսյանի անվան ռազմական ակադեմիայի շրջանավարտների համար ավարտական քննությունները կարող են հանդիսանալ նաև ատեստավորման քննություն։
Պաշտպանության նախարար Սուրեն Պապիկյանն այսօր Ազգային ժողովում հայտարարեց, որ 4-ամյա կրթությունից հետո սպաները ստանում են բնակարան, որի արժեքը, այսօրվա գներով, 35 միլիոն դրամ է։
«Սա ենթադրում է, որ պետք է 20-ամյա պայմանագիրն ամբողջությամբ իրացվի։ Գերազանց առաջադիմություն ունեցող յուրաքանչյուր սպա, որ ավարտում է ակադեմիան, կարող է ստանալ 620 հազարից մինչև 750 հազար դրամ աշխատավարձ։ Հարցս հետևյալն է՝ ասեք մի մասնագիտություն, որ բուհը ավարտելուց հետո քաղաքացին կարող է անմիջապես վաստակել 620-ից մինչև 750 հազար դրամ աշխատավարձ, բնակարան»,- նշեց նա։
Պապիկյանը խորհուրդ տվեց ընտրել մասնագիտություն, որն ավելի լավն է։
«Կարծում եմ՝ ամենալավ ու ամենաերաշխավորված մասնագիտությունը հենց զինվորական մասնագիտությունն է, կոչս է մեր պատանիներին, նրանց ծնողներին՝ մտածեք, կողմնորոշվեք հօգուտ զինվորական ծառայության և սպայի պատվաբեր պաշտոնին ու դերին»,- հավելեց Պաշտպանության նախարարը։
