«Ուրախ ավտոբուս»-ը փոխել է երաժշտությունը, հիմա թալանողը Ռուզաննա Խաչատրյանն է: Այս մասին լրագրողների հետ զրույցում ասել է Պաշտպանության նախկին նախարար, ԱԺ «Հայաստան» խմբակցության ղեկավար Սեյրան Օհանյանի կինը՝ Ռուզաննա Խաչատրյանը:
«2018 թվականից առայսօր բազմաթիվ դրվագներով ասվում է՝ Սեյրան Օհանյանը այս է տարել, այն է տարել, ինչպես տեսնում եք՝ «ուրախ ավտոբուս»-ը փոխել է երաժշտությունը, հիմա թալանողը Ռուզաննա Խաչատրյանն է: Ես հաճույքով ու արժանապատիվ ընդունել եմ այդ մարտահրավերը»,- նշել է նա:
Անդրադառնալով «ուրախ ավտոբուսին»՝ Ռուզաննա Խաչատրյանը նշել է, որ կարծում է՝ դատական գործը քաղաքական հետապնդման նպատակ ունի, հավելում է, որ իրեն մեկ անգամ կանչել են վկայի կարգավիճակով, երկրորդ անգամ՝ կասկածյալի, և երրորդ անգամ արդեն տեղեկացրել են գործը դատարան գնալու մասին:
«Որևէ ապացույց չկա, որ ես հանցավոր գրուպպա եմ, ես անգամ չգիտեմ, թե ինչի մասին է խոսքը: Ես գիտեմ՝ ենթադրում եմ, որ 2023 թվականին պատվեր է եղել, որ իմ վրա քրեական գործ հարուցեն: Չեմ կարող ասել ինչու, գուցե ես ունեմ քաղաքական հայացքներ, գուցե ունեմ կերպար, գուցե Մասիսն իմ սրտում է, Արցախն էլ իմ հոգում: Անկեղծ ասած՝ ուսադիրներով անձնավորությանն հարցրել եմ, թե ուր է դատարանի վճիռը: Ոնց կարող է ինձ մեղադրեն ինչ որ մեկի գույքը չհայտարարագրելու համար»,-նշել է նա:
Նա նշել է, որ իր կյանքում բոլոր ճակատամարտերը հաղթել է, սա ևս կհաղթի:
Նշենք, որ քրեական գործը վերաբերում է գույքի օտարմանը և հայտարարագրերում երկու անշարժ գույքի առկայությունը թաքցնելուն։ Մասնավորապես, ըստ մեղադրանքի, Ռուզաննա Խաչատրյանը 2021 թվականի դեկտեմբերի 13-ից 2022 թվականի հունիսի 23-ն ընկած ժամանակահատվածում կազմակերպել և ղեկավարել է Աննա Բադալյանի և Կարինե Մարգարյանի կողմից քաղաքացիական գործով ապացույցներ կեղծելը, կազմակերպել և ղեկավարել է Աննա Բադալյանի կողմից քաղաքացիական գործով արգելանքի տակ գտնվող գույքերի նկատմամբ ապօրինի գործողությունների կատարումը, որը դրսևորվել է այդ գույքերն ապօրինի օտարելով, ինչպես նաև, 2022 թվականից մինչև 2024 թվականն ընկած ժամանակահատվածում, հանդիսանալով Հայաստանի Հանրապետության օրենսդրությամբ սահմանված հայտարարագիր ներկայացնելու պարտականություն ունեցող անձ, իր կողմից ներկայացված հայտարարագրերում թաքցրել է հայտարարագրման ենթակա թվով 2 անշարժ գույքերի վերաբերյալ տվյալները, որը հանգեցրել է առանձնապես խոշոր չափերով գույքերի չհայտարարագրմանը:
