Հակոբ Պարոնյանի անվան երաժշտական կոմեդիայի պետական թատրոնի ներկայիս ղեկավարությունը՝ տնօրեն Լիլիթ Պետրոսյանի գլխավորությամբ, բարձր գնահատելով թատրոնի նախկին տնօրեն, հայ դերասան, արվեստաբան, թանգարանագետ Սերյոժա Արաքելյանի երկարամյա գործունեությունը, վերջինիս շնորհել է շնորհակալագիր՝ երկար տարիների նվիրական աշխատանքի և անձնական հավաքածուից թատրոնին արխիվային նյութեր նվիրաբերելու համար։
Ընդգծենք, որ Ս. Արաքելյանի գործունեության տարիներին թատրոնը շարունակել է պահպանել իր ստեղծագործական դիմագիծը և զարգացել է մեծ տեմպերով՝ հավատարիմ մնալով հայկական երաժշտական կոմեդիայի լավագույն ավանդույթներին և միաժամանակ ընդլայնելով ժամանակակից բեմարվեստի հնարավորությունները։
Հակոբ Պարոնյանի անվան երաժշտական կոմեդիայի պետական թատրոնը հանդիսանում է Հայաստանի թատերական կյանքի կարևորագույն մշակութային օջախներից մեկը։ Թատրոնը հիմնադրվել է 1941 թվականի դեկտեմբերի 23-ին, իսկ պաշտոնական բացումը տեղի է ունեցել 1942 թվականի հունիսի 22-ին՝ Ռուդոլֆ Նելսոնի «Թագավորը զվարճանում է» օպերետի բեմադրությամբ։ 1962 թվականից թատրոնը կրում է հայ մեծ երգիծաբան Հակոբ Պարոնյանի անունը։
Տասնամյակների ընթացքում թատրոնը դարձել է հայկական երաժշտական կոմեդիայի և երգիծական բեմարվեստի կարևոր կենտրոն՝ համախմբելով հանրապետության անվանի դերասանների, ռեժիսորների և երաժիշտների։ Թատրոնը մասնակցել է միջազգային հեղինակավոր փառատոների ԱՄՆ-ում, Իրանում, Վրաստանում, Սիրիայում և մի շարք այլ երկրներում՝ արժանանալով մրցանակների և մասնագիտական բարձր գնահատանքի։
Ներկայումս տնօրեն Լիլիթ Պետրոսյանի շնորհիվ թատրոնի շարունակում է ակտիվ ստեղծագործական գործունեությունը՝ հանդիսատեսին ներկայացնելով ժամանակակից մեկը մյուսից հետաքրքիր բեմադրություններ՝ պահպանելով ժպիտ և բարձր տրամադրություն պարգևելու իր բազմամյա առաքելությունը։
