«Ֆինանսների նախարարության կարծիքը ոչինչ չի նշանակում»,-գրում է «Առողջության իրավունք» ՀԿ-ի նախագահ Անուշ Պողոսյանը՝ շարունակելով.
«Այսօր կառավարության նիստում ընդունվեց մի որոշում, որը հերթական անգամ ցույց տվեց, թե ինչպես է «ժողովրդավարություն» կոչվածը կիրառվում միայն հայտարարություններում։
Խոսքը վերաբերում է «Առողջության համընդհանուր ապահովագրության մասին» օրենքին, ըստ որի՝ ԱՀԱ պետական հիմնադրամի գլխավոր տնօրենի պաշտոնը պետք է համալրվի մրցույթով։ Սակայն մրցույթ կազմակերպելու համար որոշվել է «հրատապ մեկ անձից» ձեռք բերել կառավարչական ծառայություններ՝ 10,000,000 դրամի չափով։
Ու հիմա ամենակարևորը․ այդ գումարը վերցվում է ՊԱԳ (Պետական առողջապահական գործակալություն) աշխատակիցների աշխատավարձի ֆոնդից։
Պարզ ասած՝ սիրելի գործընկերներ, ձեզ ազատում են աշխատանքից կամ կրճատում ձեր հաշվին նախատեսված միջոցները, որպեսզի այդ գումարներով վճարեն մի կազմակերպության, որը կգա ու «մրցույթ» կկազմակերպի։ Իսկ թե ում համար է այդ մրցույթը նախատեսված, բոլորս շատ լավ հասկանում ենք։
Սա այն դեպքում, երբ ՀՀ ֆինանսների նախարարությունը նախագծին տվել է բացասական եզրակացություն՝ հստակ նշելով․
• ծառայությունները պետք է ձեռք բերվեն հենց Հիմնադրամի միջոցների հաշվին, ոչ թե ՊԱԳ աշխատակիցների աշխատավարձերի,
• գործընթացը հնարավոր էր սկսել ավելի վաղ և անցկացնել մրցակցային գնումներով, ոչ թե «հրատապ մեկ անձից» տարբերակով։
Բայց Առողջապահության նախարարությունում, կարծես, արդեն որոշումները չեն քննարկվում, այլ պարզապես ձևակերպվում են։
Ֆինանսների նախարարության կարծիքը՝ անտեսված։
Մրցակցային ընթացակարգը՝ անտեսված։
ՊԱԳ աշխատակիցների ճակատագիրը՝ անտեսված»։
