Հայաստանից որոշ ապրանքների մատակարարումների սահմանափակումները բացասական ազդեցություն չեն ունենա Ռուսաստանի տնտեսության, այդ թվում՝ գնաճի վրա։ Խոսքը խորշային ապրանքների մասին է։ Այս մասին Իզվեստիա-ին հայտնել է ՌԴ տնտեսական զարգացման նախարար Մաքսիմ Ռեշետնիկովը, հաղորդում է ՏԱՍՍ-ը:
«Ես պատրաստ եմ մեր շուկաների մասով ասել, որ մեր շուկաների վրա, իհարկե, ազդեցություն չի լինի։ Երեկ ինձ հարցնում էին, թե ինչ կլինի գնաճի հետ և այլն։ Մենք վիճակագրորեն չենք նկատի այդ բոլոր թվերը։ Դրանք բավականին խորշային ապրանքներ են։
Հիմնական ծավալը մենք միշտ ապահովում ենք սեփական արտադրության հաշվին՝ այնտեղ, որտեղ անհրաժեշտ է։ Այս ուղղություններով մենք, այնուամենայնիվ, մեր շուկաներում մատակարարների բավականին դիվերսիֆիկացված կառուցվածք ունենք։ Թեև, իհարկե, մենք գնահատում ենք բոլորին, բայց դա ոչ մի խնդիր չի ստեղծի մեր տնտեսության համար»,- ասել է Ռեշետնիկովը։
Այսպես է նա պատասխանել այն հարցին, թե ինչպես կազդի ՌԴ տնտեսության վրա Հայաստանից գյուղմթերքի և մի շարք այլ ապրանքների մատակարարումների սահմանափակումների կիրառումը։
