Հարգելի՛ գործընկերներ, սիրելի՛ բուժաշխատողներ, այսօր ցանկանում եմ ձեզ դիմել ոչ միայն որպես ղեկավար, այլ՝ որպես մարդ, ով պատիվ է ունեցել աշխատելու ձեզ հետ՝ մի մեծ ընտանիքում, որի անունը շտապբուժօգնություն է։ Այս մասին հայտարարություն է տարածել «Շտապօգնություն» ՓԲԸ-ի տնօրեն Ռուբեն Գրիգորյանը։
«Ես ավարտում եմ իմ գործունեությունը տնօրենի պաշտոնում։
Խորին շնորհակալություն եմ հայտնում «Շտապբուժօգնություն» ՓԲԸ-ի բոլոր աշխատակիցներին՝ ձեր նվիրումի, տոկունության, մասնագիտական բարձր պատասխանատվության և մարդկայնության համար։ Շտապբուժօգնության համակարգը ուժեղ է հենց ձեր շնորհիվ։
Առանձնահատուկ շնորհակալություն եմ հայտնում այն մարդկանց, ովքեր ամենադժվար պահերին կանգնել են կողքիս, հավատացել մեր աշխատանքին և միասին կրել այս մեծ պատասխանատվությունը։ Միաժամանակ, իմ շնորհակալությունն եմ հայտնում ՀՀ առողջապահության նախարարին և առողջապահության նախարարության ողջ անձնակազմին՝ առողջապահական համակարգի զարգացմանն ուղղված համատեղ աշխատանքի համար։
Իմ խորին երախտագիտությունն ու առանձնահատուկ շնորհակալությունն եմ հայտնում Երևանի քաղաքապետ Տիգրան Ավինյանին՝ մշտական վստահության, սկզբունքային աջակցության և շտապբուժօգնության ծառայության զարգացման նկատմամբ ցուցաբերած հետևողական ուշադրության համար։ Քաղաքապետի աջակցությամբ և հստակ տեսլականի շնորհիվ հնարավոր դարձավ կյանքի կոչել բազմաթիվ կարևոր ծրագրեր ու բարեփոխումներ, որոնք նպաստեցին ծառայության տեխնիկական վերազինմանը, աշխատանքային պայմանների բարելավմանը և քաղաքացիներին մատուցվող բժշկական օգնության որակի բարձրացմանը։
Առանձնակի շնորհակալություն եմ հայտնում նաև Երևանի փոխքաղաքապետ Սարգիս Մադաթյանին՝ ոլորտի խնդիրների նկատմամբ ցուցաբերած մշտական հոգատար վերաբերմունքի, օպերատիվ արձագանքի և արդյունավետ համագործակցության համար։ Մեր համատեղ աշխատանքի ընթացքում բազմաթիվ կարևոր նախաձեռնություններ իրականացվեցին փոխըմբռնման, գործընկերային վստահության և մեկ ընդհանուր նպատակի՝ երևանցիներին առավել հասանելի և որակյալ շտապբուժօգնություն ապահովելու գաղափարի շուրջ։
Շնորհակալություն եմ հայտնում նաև Երևանի քաղաքապետարանի առողջապահության վարչության պետ Դավիթ Կարապետյանին՝ ամենօրյա համագործակցության, մասնագիտական աջակցության և համակարգի զարգացման գործում ունեցած նշանակալի ներդրման համար։
Մաղթում եմ բոլորիդ անվտանգ հերթապահություններ, ուժ, առողջություն, մասնագիտական նոր հաջողություններ և կայուն խաղաղություն։
Շնորհակալ եմ միասին անցած ճանապարհի, ձեռքբերումների, հաղթահարած դժվարությունների և ստեղծած արժեքների համար։ Ինձ համար մեծ պատիվ էր ղեկավարել այս բացառիկ կոլեկտիվը և աշխատել մարդկանց հետ, որոնց համար մասնագիտությունը պարզապես աշխատանք չէ, այլ առաքելություն։
Վստահ եմ, որ «Շտապբուժօգնություն» ՓԲԸ-ն շարունակելու է զարգանալ, ամրապնդվել և ծառայել մեր քաղաքացիներին նույն պատասխանատվությամբ, նվիրումով և պատվով։
Հարգանքով՝
Ռ. Ա. Գրիգորյան»,-նշել է նա։
