Մեր ժողովուրդը մեծ հաշվով քվեարկել է քաղաքական անապատի համար: Այս մասին ասել է Էդմոն Մարուքյանը:
«Սա քաղաքական անապատ է, դեգրադացիայի վերջին աստիճան է, ու հանկարծ չմտածեք, որ մենք չենք անցել, դրա համար եմ ասում, բացարձակ, ուրիշ ուժեր կարող էին անցնել, ովքեր քաղաքական միտք ունեն, ոչ մեկ չի անցել, այդ քաղաքական անապատի մեջ ՀՀ-ի առջև ծառացած խնդիրներն ու մարտահրավերները, որը ունենք, չեն լուծվելու:
Շատ նամակներ եմ ստացել, որոնցում մարդիկ ասում են՝ վայ, շատ ցավում ենք ձեզ համար, այս ինչ ահավոր արդյունքներ են, ուզում եմ ձեզ ասել, որ մենք լավ ենք, մեզ մոտ ամեն բան կարգին է, մեզ ոչինչ չի պատահել, մենք մեր ժողովրդին քաղաքական առաջարկ ենք արել, լուծումներ ենք առաջարկել Հայաստանի առջև ծառացած խնդիրների վերաբերյալ, ժողովուրդը ընտրել է քաղաքական անապատի ճանապարհը, և այդ ճանապարհին անգամ «օազիս» չի հանդիպելու։
Քաղաքական լուծումներ չեն գտնվելու, քաղաքական համակարգը չի առողջանալու, և երկիրն ավելի է մխրճվելու երրորդ ժամկետով կառավարման ավտորիտար մղձավանջի մեջ։ Շատերը խոսում են սահմանադրական մեծամասնություն չունենալու մասին՝ այն ներկայացնելով իբրև ընդդիմության հաղթանակ: Երբ իշխանությունը կարիք ունենա սահմանադրական մեծամասնությամբ որևէ նախագծի անցկացման, կհայտնվեն դրա համար անհրաժեշտ մի քանի ընդդիմադիր պատգամավորներ, այդ առումով նույնպես քաղաքական անապատ է»,- նշել է Մարուքյանը:
