Այս շաբաթ լրանում է Լեռնային Ղարաբաղի հակամարտության գոտում 44-օրյա պատերազմի ավարտի երկրորդ տարին։ Այս առիթով ԵՄ-ն հիշում է վերջին 30 տարիների ընթացքում հակամարտության բոլոր հայ և ադրբեջանցի զոհերին։ Լիովին գիտակցելով այս դժվարին ժառանգությունը՝ այն երկու կողմերին էլ կոչ է անում շրջել թշնամության էջը և շարունակել հաշտեցման ջանքերը՝ կանխելու մարդկային կյանքերի և վնասների հետագա անհարկի կորուստները։
ԵՄ-ն ողջունում է Հայաստանի և Ադրբեջանի ղեկավարության կողմից տարաձայնությունները հաղթահարելու և տարածաշրջանում կայուն խաղաղության հասնելու բազմաթիվ քայլերը։ ԵՄ-ն բարձր է գնահատում նրանց շարունակական ներգրավվածությունը տարբեր մակարդակներում և տարբեր ձևաչափերով ընթացող բանակցություններում:
Թեև այս բանակցություններն ակնհայտորեն բարդ են և ժամանակ կպահանջեն, կարևոր է, որ այդ թափը պահպանվի, համաձայնեցվեն առաջ շարժվելու կոնկրետ քայլեր և ստեղծվի անվտանգ, ապահով և բարեկեցիկ միջավայր՝ ի շահ տարածաշրջանի բոլոր մարդկանց:
Դեռևս անկայուն միջավայրում, որտեղ վերջին 30 տարիների վերքերը հեռու են ապաքինվելուց, ԵՄ-ն ևս մեկ անգամ կոչ է անում կողմերին մեղմել իրենց հռետորաբանությունը և խուսափել լարվածության ցանկացած ավելորդ էսկալացիայից, այդ թվում՝ միմյանց հասցեին հնչող սպառնալիքներից կամ մեղադրանքներից, ռազմական սադրանքներից և գործողություններից։
ԵՄ-ն կշարունակի ակտիվորեն ներգրավված լինել երկու կողմերի ցանկությունների կատարման գործում և աջակցել նրանց աշխատանքում բոլոր չլուծված խնդիրների համապարփակ և արդար կարգավորման ուղղությամբ:
