2023թ. փետրվարի 25-ին 168.am-ում և կայքի յութուբյան ալիքում հրապարակվեց 168.am-ի լրագրող Դավիթ Սարգսյանի հեղինակային «Երկու երես» հաղորդաշարի հերթական թողարկումը Երևանի դե ֆակտո քաղաքապետ, Երևանի ավագանու առաջիկա ընտրություններում Նիկոլ Փաշինյանի «Քաղաքացիական պայմանագիր» կուսակցության քաղաքապետի թեկնածու Տիգրան Ավինյանի մասին:
Տեսանյութը վերնագրված էր այսպես՝ «Տիգրան Ավինյան՝ նորահայտ մեծահարուստը»: Նրանում օգտագործվել են Տիգրան Ավինյանի հարցազրույցներից հատվածներ, բացառապես բաց աղբյուրներից վերցված այլ տեղեկություններ փոխքաղաքապետի ու նրա ընտանիքի, ընկերների բիզնեսների, ունեցվածքի մասին: Պարզվում է, Տիգրան Ավինյանը չի սիրում ճշմարտության հետ առերեսվել և դիմել է դատարան՝ ներողություն խնդրելուն, պատիվն, արժանապատվությունը և գործարար համբավն արատավորող տեղեկությունները հերքելուն պարտավորեցնելու և դրամական փոխհատուցում վճարելու պահանջով:
Այս հայցով պատասխանողներ են Դավիթ Սարգսյանը և «168 ժամ» ՍՊԸ-ն: Տիգրան Ավինյանն ու նրա ներկայացուցիչը՝ Հարություն Հարությունյանը, հերքման պահանջ մինչ դատարան դիմելը չեն ներկայացրել: Ավելին, հայցը վարույթ ընդունելուց հետո ոչ Դավիթ Սարգսյանը, ոչ 168.am-ը որևէ անգամ ծանուցում չեն ստացել:
Դա դեռ քիչ է, Դավիթ Սարգսյանի աշխատավարձային հաշվեհամարի և անշարժ գույքի վրա կալանք է դրվել, քանի որ հայցվոր կողմը դատարանից պահանջել է կիրառել հայցի ապահովման միջոց, ինչը բավարարվել է մասնակի, 9 միլիոն դրամի չափով:
«Տիգրան Ավինյանի հայցի մասին տեղեկացել եմ Դատալեքսի միջոցով: Հայցադիմումն առ այսօր չեմ ստացել, բայց հայցի ապահովման միջոցը կիրառվել է առանց նույնիսկ հայցադիմումն ինձ ուղարկելու»,- ասաց Դավիթ Սարգսյանը:
Այն մասին, որ իր աշխատավարձային քարտի վրա արգելանք է դրվել, լրագրողը տեղեկացել է երեկ երեկոյան, երբ ցանկացել է վճարել կոմունալ վարձավճարներն ու չի կարողացել դա անել:
«Ուշ երեկոյան պարզել եմ, որ կալանքը դրված է դատարանի՝ մայիսի 2-ի որոշմամբ: Դատարանը փաստորեն մայիսի 8-ին է ստացել որոշումը ու հենց այդ օրն էլ կալանք է դրել հաշվիս վրա: Այսօր առավոտյան էլ Դատական ակտերի հարկադիր կատարումն ապահովող (ԴԱՀԿ) ծառայությունից իմացել եմ, որ 9 միլիոն դրամի չափով է արգելանք դրված իմ հաշվեհամարի ու անշարժ գույքի նկատմամբ»,- ասաց Դավիթ Սարգսյանը:
Ստացվում է, որ եթե Դատարանը միջանկյալ միջոց կիրառելու ու լրագրողի հաշիվների ու գույքի վրա կալանք դնելու հայցապահանջը բավարարել է մասնակի, այն է՝ 9 միլիոն դրամի չափով, ուրեմն Տիգրան Ավինյանը շատ ավելի մեծ գումար է պահանջել:
Ինչևէ, ևս մեկ անգամ փաստենք, որ ոչ 168.am-ը, ոչ Դավիթ Սարգսյանը հայցի վերաբերյալ դատարանից կամ Տիգրան Ավինյանի ներկայացուցչից որևէ ծանուցում չեն ստացել, մինչդեռ նույն datalex.am-ից տեղեկանում ենք, որ դատարան Տիգրան Ավինյանի հայցադիմումը ստացվել է մարտի 21-ին:
Դատական Գործ N: ԵԴ/13020/02/23
Հայցադիմումը մակագրվել է Երևան քաղաքի քաղաքացիական դատարանի դատավոր Ռուբեն Բունիաթյանին, այնուհետև ապրիլի 18-ին կատարվել է վերաբաշխում դատավորի ժամանակավոր անաշխատունակության հիմքով: Ներկայումս գործը գտնվում է Երևանի քաղաքացիական դատարանի դատավոր Էդուարդ Գրիգորի Ամալյանի վարույթում:
Դատավորը վերամակագրումից հետո հայցադիմումը վարույթ է ընդունել մայիսի 2-ին և հենց այդ օրն էլ քննել պատասխանող Դավիթ Սարգսյանին պատկանող գույքի վրա հայցագնի չափով արգելանք դնելու հարցը ու մասնակի՝ 9 միլիոն դրամի չափով, փաստորեն, բավարարել այն:
Տիգրան Ավինյանին թվում է՝ դատարաններ դիմելով, լրագրողների հաշիվների ու գույքերի վրա արգելանք դնելով՝ կարող է խուսափել իր մասին տեղեկատվության հանրայնացումից:
Սա նորություն չէ. ՔՊ-ական իշխանությանը բնորոշ ձեռագիր է առհասարակ լրատվամիջոցներին ու լրագրողներին լռեցնել փորձելը՝ նրանց ֆինանսական ծանր դրության մեջ դնելով, բայց ինչպես բազմիցս առիթ ունեցել են համոզվելու, դա չի աշխատում:
Իսկ Տիգրան Ավինյանն իզուր է կարծում, որ իր ցածր վարկանիշի մեղավորը 168.am-ն ու Դավիթ Սարգսյանն են:
Դե ինչ, ինչպես ասում են՝ կհանդիպենք դատարանում. խոստանում ենք այս գործով հնչեղ, հրապարակային լուսաբանում ապահովել:
