Մենք միասնական ջանքերով կասեցնելով բոլոր սպառնալիքները՝ հայոց նոր զարթոնք ենք բերելու մեր գալիք սերունդներին. Գրիգոր Մարտիրոսյան

Արցախի Հանրապետության անկախությունը Արցախն ազատագրած հերոսների կողմից սերունդներին նվիրված վեհ բարձունքն էր, ինչը հայ ժողովրդի երկու պետությունների կայացման շրջափուլում յուրաքանչյուր հայի հնարավորություն տվեց բարձր գլխով ապրել և իր մեջ կրել անկախության ու ազատության ողջ արժեհամակարգը։

Ցավոք, Արցախի անկախացման և միջազգային ճանաչման գործընթացը, որի հայանպաստ ելքի փնտրտուքներում հայկական կողմը տարիներ շարունակ բանակցում էր, այժմ մերժված է ՀՀ դե ֆակտո իշխանությունների կողմից։

Այսօր ՀՀ դե ֆակտո իշխանությունները մեզ թողել են քանդված պետություն, օր օրի առաջ եկող թշնամի, ամեն շաբաթ զորամասերում զոհվող զինվորներ, անգործության մատնված պետական համակարգ։

Այսօր, Արցախն ազատագրած և տարածաշրջանում լավագույն բանակը հանդիսացող Հայկական Բանակը քանդվել է ՀՀ դե ֆակտո իշխանությունների կողմից, ինչի արդյունքում հայ զինվորների ծառայությունն անցնում է կենցաղային ցածրագույն պայմաններում՝ ինչի արդյունքում հունվարին ականատես եղանք զինվորների կացարանի այրմանը և մեկ տասնյակից ավելի զոհերի։

Այսօր Արցախն օրհասական իրավիճակում է։ Արցախում գտնվող մեր հայրենակիցները զրկված են մարդու տարրական իրավունքներից։ Նրանք սովամահ են լինում, չունեն կրթության, ազատ տեղաշարժի իրավունք, նրանց առևանգում են և գերեվարում, իսկ զուգահեռ իրականությունում ունենք դե ֆակտո իշխանություններ, որոնք արցախահայությանը սովամահ անող պետության աղետներին արձագանքում են հումանիտար օգնությամբ։

Ադրբեջանական կողմը իր երբեմնի ամենահավատարիմ դաշնակցի՝ Նիկոլ Փաշինյանի հետ, Արցախում գտնվող մեր հայրենակիցներին կանգնեցրել են ցեղասպանության լրջագույն սպառնալիքի առաջ, ինչի արդյունքում Արցախցին զրկված է կյանքի կենսական պայմաններից։

Սակայն թշնամին չի հաշվարկել մեկ բան․․․

Չի՛ մահացել հայի իրական տեսակը, հայը պայքարելու է և մենք ձեր կողքին ենք սիրելի արցախահայություն։ Մենք միասնական ջանքերով կասեցնելով բոլոր սպառնալիքները՝ հայոց նոր զարթոնք ենք բերելու մեր գալիք սերունդներին։