Երևանի ընդհանուր իրավասության քրեական դատարանի Շենգավիթ նստավայրում այսօր տեղի ունեցավ Պեմզաշենում մոր և երկու երեխայի դաժան սպանության գործով դատավարությունը։
Մեղադրող կողմը ներկայացրեց գործին առնչվող ապացույցները՝ վկաների ցուցմունքները, տեղանքի զննությունը, դատաբժշկական, դատագենետիկական փորձաքննության եզրակացությունները։
Ըստ մեղադրող կողմի՝ սպանված մոր՝ Զարինե Մելքիսեթյանի հարևանը՝ Արմենուհի Ռափյանը, նկարագրել է, որ դեպքի օրը լսել է ոչ սովարական ձայներ, ճիչեր, բղավոցներ, բայց չի արձագանքել, քանի որ մտածել է, որ երեխայի վրա է մայրը բարկանում։
Նա ցուցմունքով նշել է, որ Արկադի Բարսեղյանի կինը՝ Արփինե Սարգսյանը, զանգահարել է իրեն, փորձել դեպքից հետո հանդիպել և պաշտպանի հետ հանդիպումներ կազմակեպել հետագայում ցուցմունք ստանալու մասով, սակայն ստացել է մերժում։
Գործում մեղադրական հիմքի ապացույցը եղել են նաև այն կանանց ցուցմունքները, որոնց հետ դեպքի հաջորդ օրերին Վրույր Բարսեղյանը Արթիկում գումարի դիմաց ունեցել է սեռական հարաբերություն, և վերջինիս մարմնական վնասվածք ստացած լինելու տվյալներ են հայտնել։
