Այսօր «Իմնեմնիմի» հաղորդման համահեղինակ Նարեկ Սամսոնյանի նամակը չկարողացան հանձնել ՀՀ-ում ԱՄՆ դեսպան Քրիստինա Քվինին։
AntiFake.am կայքի լրագրող Դավիթ Ֆիդանյանը ասաց, որ նամակն ուղղված է ԱՄՆ դեսպանին, և իրենք այսօր այն փորձելու են հանձնել նրան, քանի որ միջազգային հանրության մոտ ԱՄՆ-ն համարվում է որպես ժողովրդավարության մարտիկ։
«Մենք այսօր այստեղ ենք, որպեսզի ի ցույց դնենք, որ Հայաստանը բնավ այն ուղով չի ընթանում, որով ցանկանում է ժողովուրդը։ ՀՀ-ում Նիկոլ Փաշինյանը հաստատել է ավտորիտար իշխանություն, որտեղ մարդկանց կարող են կալանավորել սուր քննադատության համար։ Կարծում եմ՝ ԱՄՆ դեսպանը տեղյակ չէ, թե ինչ է կատարվում Նարեկ Սամսոնյանի և Վազգեն Սաղաթելյանի գործով»։
Դավիթ Ֆիդանյանը լրագրողներին հայտնեց, որ նամակն առձեռն չկարողացան փոխանցել ԱՄՆ դեսպանին։ Իրենց ասել են, որ դա պետք է իրականացվի էլեկտրոնային տարբերակով։
«Ինձ համար մի փոքր տարօրինակ էր, թե ինչու անձամբ չենք կարող հանձնել»։
Նա նախ կարդաց Նարեկ Սամսոնյանի նամակը, ապա հայտնեց, որ այն կուղարկեն նաև էլեկտրոնային եղանակով։
