Ադրբեջանի արևելյան շրջաններից դեպի Նախիջևան տրանսպորտային միջանցքը կարող է անցնել ինչպես Իրանի, այնպես էլ Հայաստանի տարածքով։ Այդ մասին հայտարարել է Թուրքիայի տրանսպորտի և ենթակառուցվածքների նախարար Աբդուլքադիր Ուրալօղլուն։ Թուրքիայի «մեսիջը» Փաշինյանին՝կամ «Զանգեզուրի միջանցք» կամ փակ սահմաններ։ Թուրքիան չի բացելու հայ-թուրքական սահմանն այնքան ժամանակ, քանի դեռ ՔՊ-ն չի բավարարել Ալիևի բոլոր պահանջները՝այդ պահանջներն ունեն սկիզբ և չունեն վերջ։ Ալիևի բոլոր պահանջների կյանքի կոչումը կազմաքանդելու է հայոց պետականությունն ու Հայաստանը վերածելու է Փաշինյանի և Ալիևի երազանքի՝ «Արևմտյան Ադրբեջանի»։ Թուրքիան չի ցանկանում լոգիստիկան անցկացնել Իրանի տարածքով, քանի որ այդ ժամանակ թուրք-ադրբեջանական կապը կախվախության մեջ է ընկնելու Թեհրանից։ Թուրքիային և Ադրբեջանին հարկավոր է «Զանգեզուրի միջանցք», որը դուրս է լինելու թե ՌԴ-ի, թե Իրանի հսկողությունից։ Արևմուտքը ցանկանում է ինքը հսկել այդ միջանցքը՝Կենտրոնական Ասիայի երկրները Մոսկվայի ազդեցությունից դուրս բերելու և այդ տարածաշրջանի նավթագազային ռեսուրսներից օգտվելու համար։ Բացի այդ, «Զանգեզուրի միջանցքը» դառնալու է Իրանի դեմ պլացդարմի մասնիկ՝Փաշինյանը պատրաստ է հանուն սեփական իշխանության Հայաստանը վերածել հակաիրանական և հակառուսական պլացդարմների։ Փաշինյանի իշխանությունը ձեռնտու է Բաքվին, Անկարային և Արևմուտքին, սակայն ոչ հայ ժողովրդին։ Անդրանիկ Պետրոսյան
