Յուրաքանչյուր քաղաքացու բարեկեցությունը որոշակիորեն փոխկապակցված է ՀՀ համընդհանուր բարեկեցության հետ: Այս մասին ԱԺ-ում 2025 թվականի պետական բյուջեի մասին օրենքի նախագծի նախնական քննարկման ժամանակ ասաց վարչապետ Նիկոլ Փաշինյանը:
«Հնարավոր է՝ լավ վաստակել, բայց համընդհանուր թշվառության և աղքատության միջավայրում այդ վաստակը վայելելու բերկրանք և հնարավորություն չունենալ, այլ ընդհակառակը՝ ունենալ մեկուսացվածության ու տագնապի զգացողություն, որ աշխատանքով ձեռք բերածդ կարող է կորսվել ապօրինի ինչ-ինչ ազդեցությունների հետևանքով: Եթե կա լայնածավալ թշվառություն և աղքատություն, հատվածական բարեկեցությունն առաջնային թիրախ է և «աչքի փուշ»: Ատելություն է ձևավորվում ցանկացած բարեկեցիկ միջավայրի նկատմամբ:
Հետևաբար, երբ ես ասում եմ, պետական բյուջեն մեր մեծ ընտանեկան բյուջեն է, դա համերաշխության մասին է»,- ասաց նա: Փաշինյանի խոսքով՝ քաղաքացիները պետական բյուջեում իրենց ներդրումն են անում հանուն բոլորի բարեկեցության: «Բարեկեցության անբաժանելի բաղադրիչ են ինչպես կենցաղային հարմարավետությունը, այնպես էլ ազատությունը, արդարությունը, օրինականությունը, արտաքին ու ներքին անվտանգությունը, մշակութային կյանքը»,- ասաց Նիկոլ Փաշինյանը:
